काठमाडौं । एसीसी यू–१९ एसिया कपको सुपर–४ मा बंगलादेशसँग नौ विकेटले पराजित भएपछि नेपाली यू–१९ को यात्रा समाप्त भएको छ । 

शुक्रबार मलेसियाको बायुमास ओभलमा सम्पन्न खेलमा नेपालले प्रस्तुत गरेको ५५ रनको लक्ष्य बंगलादेशले ९.५ ओभरमा एक विकेट गुमाएर पूरा गर्‍यो । त्यसअघि टस हारेर ब्याटिङमा आएको नेपालले निर्धारित ११ ओभरमा आठ विकेट गुमाएर ५४ रनको योगफल खडा गरेको थियो ।

वर्षाका कारण निर्धारित समयमा सुरु हुन नसकेपछि खेल ११ ओभरमा घटाइएको थियो । 

बंगलादेशको जितमा फमिदा चोयाले सर्वाधिक २६ रन बनाइन् । यस्तै, मोसामत इभाले १८ र सुमैया अख्तरले १० रन थपिन् ।

नेपालकी कुशुम गोदले एक विकेट लिइन् ।

त्यसअघि नेपालकी ओपनर सावित्री धामीले ११ रन बनाएकी थिइन् । सावित्रीबाहेक, नेपालका अन्य कुनै पनि ब्याटरले दोहोरो अंकमा रन जोड्न सकेनन् । कप्तान पूजा महतोले नौ, अलिशा यादवले आठ र ज्यात्स्निका मरासिनीले पाँच रन थपिन् ।

बंगलादेशकी फर्जाना इस्मिन, अनिशा अन्तर सोबा, फहोमिदा चोया र हबिाब इस्लामले समान एक विकेट लिइन् ।

प्रतियोगितामा नेपाल समूह ‘बी’को विजेता बन्दै सुपर–४ मा आएको हो । नेपालले समूह चरणमा पाकिस्तानविरुद्ध ६ विकेटको जित निकालेको थियो । समूह चरणको दोस्रो खेलमा भने नेपाल र भारतबीचको खेल वर्षाका कारण रद्द भएको थियो । 

सुपर–४ को पहिलो खेलमा नेपाल र श्रीलंकाबीचको खेल पनि वर्षाका कारण रद्द भएको थियो । सोही कारण प्रतियोगिताको फाइनलमा स्थान बनाउन नेपाललाई आज जितको आवश्यकता थियो । हारसँगै नेपाल प्रतियोगिताबाट बाहिरिँदा बंगलादेशले भने फाइनलमा स्थान बनाएको छ । बंगलादेशले अब उपाधिका निम्ति भारतसँग प्रतिस्पर्धा गर्नेछ ।