काठमाडौं । नेकपा (एमाले)का सांसद योगेश भट्टराईले निजामती कर्मचारीको ट्रेड युनियनका विषयमा राजनीतिक दलहरूबीच राष्ट्रिय सहमति खोज्नुपर्ने बताएका छन् । मंगलबारको राज्य व्यवस्था समितिको बैठकमा निजामती विधेयकबारे संशोधन प्रस्ताव राख्दै उनले ट्रेड युनियन चाहिँदैन र सर्वेसर्वा हो भन्ने बहस आवश्यक नभएको बताए ।

“ट्रेड युनियन चाहिँदै चाहिँदैन भन्ने एक्स्ट्रिम बहस नगरौँ । ट्रेड युनियन सर्वेसर्वा हो, सम्पूर्ण कर्मचारी प्रशासन ट्रेड युनियनले चलाउँछ भन्ने कुराको बहस नगरौँ,” भट्टराईले भने, “राजनीतिक सहमतिका आधारमा हिजोका मान्यताबाट बदल्नुपर्छ ।”

उनले राजनीतिक संरक्षण र अर्थवादी चिन्तनको बीचबाट जवाफदेही संस्था खोज्नुपर्ने धारणा राखे । “राजनीतिक संरक्षण र अर्थवादी चिन्तन नकारात्मक कुरा हो । यसको बीचबाट जानुपर्छ । आधिकारिक ट्रेड युनियनलाई मुख्य आधार बनाएर जवाफदेही बनाउनुपर्छ । यसमा राष्ट्रिय सहमति गरौँ । पपुलिजमको कुरा नगरौँ,” उनले भने ।

भट्टराईले ट्रेड युनियनमा राजनीतिक संलग्नतालाई कसरी व्यवस्थित गर्ने, व्यावसायिक मर्यादामा कसरी राख्ने भन्नेमा बहस हुनुपर्ने औँल्याए ।

राजनीतिक संस्था खारेज गरेर कर्मचारीको आधिकारिक ट्रेड युनियनमात्रै राख्नुपर्ने पक्षमा अधिकांश सांसदहरूले मत राखेका छन् ।