पोखरा । गण्डकी सरकारले गएको मंसिर २० गते राजपत्रमा प्रदेशसभा सचिवालयको सूचना प्रकाशित गर्दै गण्डकी प्रदेशसभा सदस्यको स्थान रिक्त भएको सूचना प्रकाशन गर्‍यो । उक्त सूचनामा, ‘म्याग्दीको बेनी नगरपालिका–८, निवासी प्रदेशसभामा समानुपातिक निर्वाचन प्रणालीअन्तर्गत नेपाली कांग्रेसबाट निर्वाचित प्रदेशसभा सदस्य माननीय विमला गौचनको मिति २०८१/०७/२९ गते ग्राण्डी अस्पताल काठमाडौंमा मृत्यु भएकोले नेपालको संविधानको धारा १८० को खण्ड (च) बमोजिम गण्डकी प्रदेशसभा सदस्यको उक्त स्थान रिक्त हुन आएको व्यहोरा ... ।’ उल्लेख गरिएको छ ।

२०७९ को प्रदेश तथा प्रतिनिधिसभा निर्वाचनअन्तर्गत गौचन नेपाली कांग्रेसको समानुपातिक प्रणालीको बन्दसूचीमा आदिवासी/जनजाति समूहको महिला क्लस्टरको पहिलो नम्बरमा थिइन् । उनै गौचन २०७९ पुस १४ गते शपथ लिँदै प्रदेशसभा सदस्य बनेकी थिइन् । तर, उपचारको क्रममा उनको गत कात्तिक २९ गते निधन भएको थियो ।

निधनपछि प्रदेशसभाले उनको स्थान रिक्त भएको सूचना प्रकाशन गरेको हो । समानुपातिक प्रणालीबाट निर्वाचित गौचनको निधन भएपछि २०७४ को समानुपातिकतर्फको बन्दसूचीको आधारमा उनको ठाउँमा स्याङ्जाकी सुनिता थापा प्रदेशसभा सदस्य बन्ने भएकी छन् ।

सोमबार नेपाली कांग्रेस केन्द्रीय कार्यसम्पादन समितिको बैठकले थापाको नाम अनुमोदन गरेको छ । कांग्रेसले गौचनको निधनप्रति दुःख व्यक्त गर्दै श्रद्धाञ्जली अर्पण गरेको छ । सोही बैठकले समानुपातिकको बन्दसूचीको आदिवासी जनजाति समूह महिलातर्फ प्राथमिक क्रमसंख्या पाँचमा रहेकी थापालाई प्रदेशसभा सदस्य पदमा मनोनयन गर्ने निर्णय गरेको पार्टीका मुख्यसचिव कृष्णप्रसाद पौडेलले जानकारी दिए ।

यो निर्णयअनुसार कांग्रेसले थापाको नाम आवश्यक कार्यान्वयनका लागि निर्वाचन आयोगमा पत्राचार गर्नेछ । प्रदेशसभाले पनि सदस्य पद रिक्त भएको बारेमा निर्वाचन आयोगलाई लिखित रूपमा जानकारी गराइसकेको छ ।

नयाँ प्रदेशसभा सदस्यको रूपमा आउने थापा स्याङ्जाको चापाकोट नगरपालिका–९ की हुन् । २०४९ सालमा जन्मिएकी थापा गण्डकी प्रदेशसभाकै सबैभन्दा कनिष्ठ प्रदेशसभा सदस्य समेत बन्नेछिन् ।

थापा अपांगता भएका व्यक्तिहरूको हकहितमा सक्रियताका साथ काम गर्दै आइरहेकी छन् । कक्षा ६ मा पढ्ने बेलामा श्रवण शक्ति गुमाएकी थापा प्रदेशसभा सदस्य बनेसँगै गण्डकी प्रदेशसभामा अपांगता/अल्पसंख्यकको पनि प्रतिनिधित्व हुनेछ । स्नातकसम्म अध्ययन गरेकी थापा नेपाली कांग्रेस महाधिवेशन प्रतिनिधि समेत हुन् । राष्ट्रिय अपांग महासंघ, गण्डकी बहिरा संघलगायत संघसंस्थामा उनी क्रियाशील छन् ।

अपांगता भएका व्यक्तिको अधिकारको पैरवी गर्ने क्रममा उनले विभिन्न अन्तर्राष्ट्रिय मञ्चमा समेत सहभागी भएकी छन् । सांकेतिक रूपमा संवाद गर्ने थापा सदस्य बनेसँगै प्रदेशसभामा दोभाषेको व्यवस्था गर्नुपर्ने भएको छ । त्यसो त दोभाषेको प्रबन्ध गर्न प्रदेशसभा सदस्य सरस्वती गुरुङले विशेष र शून्य समयमा तीनपटकसम्म माग गरेकी थिइन् ।