काठमाडौं । नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले सरकारले समयमै प्रतिनिधिसभाको अधिवेशन आह्वान नगरे विशेष अधिवेशनको माग गर्ने बताएका छन् । 

राष्ट्रिय कर्मचारी महासंघको १८औँ स्थापना दिवसका अवसरमा सोमबार काठमाडौंमा आयोजित कार्यक्रममा प्रचण्डले सरकारले तत्काल प्रतिनिधिसभाको अधिवेशन आह्वान नगर्ने सूचना आफूले पाएको दाबी गरे । उनले जरुरी परे संसद्को विशेष अधिवेशनबाट संघर्षको घोषणा गर्ने र सडकमा लाखौँ जनतासँग मिलेर प्रतिक्रियावादीविरुद्ध लड्ने पनि बताए ।

प्रचण्डले सुशासनलाई उच्च प्राथमिकता दिएर भ्रष्टाचारमा संलग्नलाई कारबाही गर्ने प्रक्रियाको थालनी गरेकै कारण आफू नेतृत्वको सरकारलाई हटाइएको पनि जिकिर गरे ।

प्रचण्डले अहिले सरकारमा रहेका दलका नेताहरूको हातमा राजनीति नरहेको र उनीहरूको राजनीति बिचौलिया र दलालहरूको हातमा रहेको प्रस्टै देखिएको आरोप लगाए । बिचौलियाहरूले घुमाएर अहिलको सरकारमा रहेका नेताहरूलाई रातारात उठबस गराएको उनको भनाइ छ ।

उनले बिचौलियाहरूले संख्याको तागत देखाएको र अब आफूहरूले जनताको तागत देखाउने बताए ।

प्रचण्डले माओवादीको सकारात्मक पहल र ज्ञानेन्द्र शाहको नकारात्मक क्रियाकलापले मुलुकमा गणतन्त्र सम्भव भएको धारणा राखे ।

त्यस्तै, उनले अहिलेको शासकीय स्वरूप र निर्वाचन प्रणाली देशका लागि हितकर नभएकाले परिवर्तन गर्नुपर्नेमा जोड दिए ।