सिरियाका राष्ट्रपति असदले देश छोडेर भागेको विद्रोहीको दाबी

विदेश

सिरियाका राष्ट्रपति असदले देश छोडेर भागेको विद्रोहीको दाबी

भन्यो– सिरिया अब स्वतन्त्र

आइतबार, मंसिर २३, २०८१

सिरियाका राष्ट्रपति असदले देश छोडेर भागेको विद्रोहीको दाबी

काठमाडौं । सिरियाली सरकारको विरोध गर्ने विद्रोही समूह हयात तहरीर अल–शाम (एचटीएएस)ले ‘तानाशाह’ राष्ट्रपति बसर अल–असद देश छोडेर भागेको दाबी गरेका छन् ।

विद्रोही समूहले राष्ट्रपति भागेपछि सिरिया हाल ‘स्वतन्त्र’ भइसकेको पनि दाबी गरेका छन् ।

विद्रोही समूह एचटीएएसले आफ्नो टेलिग्राम च्यानलमा एउटा कालो अध्याय समाप्त भएको र नयाँ सुरुआत भएको समेत जनाएको छ ।

विद्रोहीहरूले विगत पाँच दशकदेखि असदको शासनबाट विस्थापित भएका वा जेलमा परेका मानिसहरू अब फर्कन सक्ने बताएका छन् । विद्रोहीले भनेका छन्, “यो नयाँ सिरिया हुनेछ जहाँ सबैले शान्तिका साथ बस्न सक्नेछन् र न्यायले शासन गर्नेछ ।”

यसअघि समाचार एजेन्सी रोयटर्सले दुई वरिष्ठ सिरियाली अधिकारीहरूलाई उद्धृत गर्दै राष्ट्रपति बसर अल–असदले दमास्कस छाडेको बताएको थियो तर उनी कहाँ गएका छन् भन्ने स्पष्ट भइसकेको छैन ।