मस्को । युक्रेनलाई सैन्य उपकरण र पानीजहाजको गतिविधिबारे जानकारी दिएको आरोपमा मस्कोको नियन्त्रणमा रहेको क्रिमियाको एक अदालतले शुक्रबार दुईजनालाई देशद्रोहको दोषी ठहर गर्दै १३ वर्षको जेल सजाय सुनाएको छ ।

मस्कोले सन् २०२२ को फेब्रुअरीमा युक्रेनमाथि आक्रमण सुरु गरेयता रूसले युक्रेनलाई सहयोग गरेको अभियोगमा दोषी ठहरिएका कैयौँ आफ्ना नागरिकविरुद्ध असाधारण कठोर फैसला जारी गरेको छ ।

सजाय सुनाइएका दुईमध्ये एक दिमित्री पोस्पेलोभले सन् २०१७ देखि युक्रेनको एसबीयू सुरक्षा सेवालाई सहयोग गर्दै आएको अभियोजनकर्ताले बताएका छन् ।

क्रिमियामा होटेलहरूमा सुरक्षा क्यामेरा जडान र सेवा गर्ने काम गर्दै गर्दा पोस्पेलोभले एसबीयूलाई फुटेजमा पहुँच दिएको, रूसी सैन्य उपकरणहरू सार्न प्रयोग गरिने सडकहरूको निगरानी गर्न अनुमति दिएको र इन्टरनेट प्रदायकका प्रयोगकर्ताहरूको तथ्यांक उपलब्ध गराएको भन्दै दोषी ठहर गरिएको छ ।

क्रिमियाको उच्च अदालतले पोस्पेलोभलाई १३ वर्षको जेल सजाय सुनाएको हो ।

अर्का व्यक्ति भ्लादिस्लाभ अफानास्येभलाई युक्रेनको सेनालाई सहयोग गर्न पैसा दिएको र नौसैनिक जहाजहरूको ‘स्थानहरूको फोटो र भौगोलिक समन्वय’ पास गरेको अभियोगमा दोषी ठहर गरिएको छ ।

“यो तथ्यांक भरपर्दो थियो र यसलाई आक्रमण गर्न प्रयोग गर्न सकिन्थ्यो,” अभियोजनकर्ताहरूले भनेका छन् । अदालतले अफानास्येभलाई १५ वर्षको जेल सजाय सुनाएको छ । रासस/एएफपी