काठमाडौं । नेपाल र चीनले संयुक्त वक्तव्य जारी गरेका छन् । मंगलबार प्रधानमन्त्री केपी शर्मा ओलीले चिनियाँ राष्ट्रपति सी जिनपिङ र प्रधानमन्त्री ली छ्याङसँग भएको भेटवार्तापछि दुवै पक्षबाट १२ बुँदे संयुक्त वक्तव्य जारी गरिएको हो ।

नेपालले चीनसँग विभिन्न परियोजनाका लागि सहयोग मागेको छ । संयुक्त वक्तव्यमा चीनले मुस्ताङको कोरला क्षेत्रमा आन्तरिक क्लियरेन्स डिपो र एकीकृत चेक पोस्ट निर्माणमा सहजीकरण गर्ने उल्लेख छ ।

केरुङ–काठमाडौं सीमापार रेलवेको सम्भाव्यता अध्ययनलाई जारी राख्ने, चीन–नेपाल रेलवे सहयोगसम्बन्धी नवौं कार्य बैठक आयोजना गर्ने, चिनियाँ पक्षले नेपाललाई रेलवे क्षेत्रका प्राविधिक जनशक्तिलाई तालिम दिने उल्लेख छ ।

नेपालले प्रधानमन्त्री ओलीको गृह जिल्ला झापामा खेलकुद रंगशाला निर्माण गरिदिन आग्रह गरेको छ । नेपाली कांग्रेसका सभापति शेरबहादुर देउवाको गृहजिल्ला डडेलधुरामा सिटी हल निर्माण गरिदिन चीनसँग आग्रह गरेको छ ।

संयुक्त वक्तव्यमा नेपालले चीनलाई मदन भण्डारी विज्ञान तथा प्रविधि विश्वविद्यालयको विकासमा तीव्रता दिन आग्रह गरेको उल्लेख छ । 

• चिनियाँ राष्ट्रपति सीले प्रधानमन्त्री ओलीलाई के भने ?

ऊर्जा क्षेत्रमा सहकार्यलाई थप विस्तार गर्ने र नयाँ ऊर्जामा पनि आदान–प्रदानको सम्भावनाहरू खोजी गर्ने दुई पक्ष सहमत भएका छन् ।

संयुक्त वक्तव्यमा केरुङ–रसुवागढी–चिलिमे २२० केभी सीमा–पार विद्युत् प्रसारणलाइनको सम्भाव्यता अध्ययनलाई तीव्रता दिनेलगायत सहमति भएको छ ।