काठमाडौं । एमालेले गएको शुक्रबार काठमाडौंको दरबारमार्गमा जागरणसभा गर्‍यो । उक्त सभापछि त्यस क्षेत्रमा फोहोर गरेको भन्दै काठमाडौं महानगरले एमालेलाई एक लाख रुपैयाँ जरिवाना तिर्न भन्दै लेखिएको पत्र सामाजिक सञ्जालमा भाइरल भयो । 

फोहोरमैला व्यवस्थापन ऐन २०६८ र काठमाडौं महानगरपालिकाको आर्थिक ऐन २०८१ अनुसार जरिवाना तिराउन पत्र लेखेको हो । 

महानगरले एमालेको ‘जागरणसभा’ सकिएपछि काटेको जरिवाना पत्र एमाले पार्टी कार्यालय च्यासलमा अझै पुगेको छैन । एमाले केन्द्रीय कार्यालयका कार्यालय सचिव भीष्म अधिकारीका अनुसार महानगरको जरिवाना पत्र कार्यालयमा आइपुगेको छैन । 

बाह्रखरीसँग उनले भने, “हामीले त्यो पत्र फेसबुकमा मात्र देखेका छौँ । हाम्रो पार्टी कार्यालयमा आइपुगेको छैन । हामीले कार्यक्रमपछि सरसफाइ गरिसकेका थियौँ त्यसपछि पनि किन पत्र काटियो थाहा छैन ?”

शुक्रबार लेखिएको जरिवाना तिराउने पत्र बोकेर महानगर आइतबार अपराह्न एमाले मुख्यालय च्यासल जाँदै छ । महानगरका प्रतिनिधिहरू शुक्रबारको पत्र बोकेर एमाले कार्यालय जान लागेको महानगरले बताएको छ ।

तर, एमालेले भने आफूले फोहोर सफा गरिनसक्दै महानगरले जरिवाना तिराएको आरोप लगाएको छ । जरिवाना तिराउने पत्र सार्वजनिक भएको केहीबेरमै एमाले कार्यकर्ताले दरबारमार्ग क्षेत्रको फोहोर संकलन गरेको एमाले महासचिव शंकर पोखरेलको दाबी छ ।

पोखरेलले शुक्रबार राति १० बजेर ५९ मिनेटमा फेसबुकमा महानगरका मेयर बालेन एमालेविरुद्ध परिचालित भएको आरोप लगाए । एमाले कार्यकर्ताले फोहोर संकलन गरिसकेर महानगरलाई गाडी पठाइदिन अनुरोध गरेको थियो । तर, महानगरले गाडी नपठाएकोे एमालेको आरोप छ ।

एमाले महासचिव पोखरेलले फेसबुकमा लेखेका छन्, “काठमाडौं महानगरका मेयर बालेन नेकपा (एमाले)विरुद्ध परिचालित छन् भन्ने कुरा आजको सभापछि सार्वजनिक गरिएको जरिवाना पर्चाबाट बुझ्न सकिन्छ । कार्यक्रम समापन भएपछि त्यहाँको सरसफाइ आयोजकतर्फबाटै भइरहेको थियो । संकलन गरिएको फोहोर उठाउन महानगरलाई गाडी पठाइदिन अनुरोध गरिएको थियो । अनुरोधलाई स्वीकार गरेर सहयोग गर्नुको साटो मेयरको निर्देशनमा फोहोर गरेको भनेर जरिवानाको प्रचार गरियो ।”

महानगरले जरिवानाको पत्र सार्वजनिक गर्दा एमाले स्वंयसेवकहरू फोहोर संकलन गरिरहेको पोखरेलको दाबी छ । उनी लेख्छन्, “जतिबेला महानगरका नाममा जरिवाना पर्चा सार्वजनिक गरियो, त्यतिबेला स्वयंसेवकहरू कार्यक्रम थलोमै फोहोर संकलन गरेर गाडीमा राख्दै थिए । मञ्च र मञ्चमा प्रयोग गरिएका सामग्री हटाउने काम सँगसँगै जारी नै थियो । तर, मेयरको ध्यान सरसफाइमा होइन जरिवानाको स्टनटबाजीमा थियो । जुन समयअगावै सार्वजनिक गरियो ।”

महानगर क्षेत्रमा सभा गरेर फोहोर गरेको भन्दै जरिवाना तिराएको यो पहिलोपटक होइन । राष्ट्रिय प्रजातन्त्र पार्टी (राप्रपा)ले २७ चैतमा गरेको आभसभापछि फोहोर भएको र ट्राफिक आइल्यान्डमा क्षति पुगेको भन्दै महानगरले पाँच हजार २२२ रुपैयाँ जरिवाना तिराएको थियो । महानगरका मेयर बालेन्द्र शाह (बालेन)का मिडिया सहजकर्ता सुरेन्द्र बजगाईंका अनुसार राप्रपाले जरिवाना तिरिसकेको छ ।

शुक्रबारको दिन कार्यालय समय समाप्त भइसकेपछि महानगरले कसरी जरिवाना पत्र काट्यो भनेर पनि प्रश्न उठेको छ । तर, महानगर भने आफ्नो नगरप्रहरी रातिसम्म पनि ड्युटीमा हुने बताउँछ । एमालेलाई जरिवाना तिराउन लेखेको पत्रमा महानगरका नगरप्रहरी निरीक्षक लीलाराज गाछाको हस्ताक्षर छ । महानगरका अनुसार नगरप्रहरी बिदाको समयमा पनि ड्युटीमा हुन्छ ।

मेयर बालेनको मिडिया सहजकर्ता बजगाईं भन्छन्, “महानगर प्रहरी कार्यालय समयमा मात्र नभई अरु समयमा पनि ड्युटीमा हुन्छ । नगर प्रहरी बिदाको दिन र राति पनि ड्युटीमा हुन्छन् ।” एमालेलाई जरिवाना तिराउने निर्णय गरेर नगरप्रहरीले आफ्नो ड्युटी गरेको महानगरको भनाइ छ ।