काठमाडौं । आन्तरिक राजस्व कार्यालय नयाँ बानेश्वर सरकारबाट सम्मानित भएको छ । राष्ट्रिय कर दिवस, २०८१ का अवसरमा शनिबार आन्तरिक राजस्व विभागले गरेको कार्यक्रममा उक्त कार्यालय सम्मानित भएको हो ।

समग्र कार्यसम्पादन समेतका आधारमा ‘ए प्लस’ ग्रेडिङ प्राप्त गर्न सफल भएकामा उक्त कार्यालयका प्रमुख कर अधिकृत गोविन्दराज आचार्यलाई अर्थमन्त्री विष्णु पौडेलले प्रशंसापत्र प्रदान गरेका हुन् । 

आन्तरिक राजस्व विभागका अनुसार, गत आर्थिक वर्षको राजस्व संकलनको लक्ष्यको तुलनामा उक्त कार्यालयले १०४ प्रतिशत उपलब्धि हासिल गरेको थियो । 

प्रशंसापत्र प्राप्तिसँगै आउँदा दिनमा कार्यसम्पादनलाई थप उत्कृष्ट बनाउने प्रमुख आचार्यले बताए ।

कार्यक्रममा अन्य आन्तरिक राजस्व कार्यालयहरूमा भद्रपुर र इटहरी र करदाता सेवा कार्यालयतर्फ तौलिहवा, दिक्तेल र पुतलीबजारका कार्यालयलाई प्रशंसापत्र प्रदान गरिएको थियो ।