काठमाडौं । गलत व्यापारिक तथ्यांक दिएको भन्दै चलचित्र ‘पूर्ण बहादुरको सारङ्गी’ उतार्ने निर्णय गरिएका हलहरू गैरकानुनी रुपमा चलिरहेको तथ्य सार्वजनिक भएको छ । ‘पूर्ण बहादुरको सारङ्गी’ निर्माण कम्पनीले गलत व्यापारिक तथ्यांक दिएका हलको नाम सार्वजनिक गर्दै आजबाट उक्त हलमा सिनेमा प्रदर्शन नगर्ने बताएको थियो । 

चलचित्र विकास बोर्डले सेभेन सिसले चलचित्र उतार्ने भन्दै उल्लेख गरेका हलको इजाजत यसअघि नै खारेज भइसकेको प्रष्ट पारेको छ । इजाजत खारेज गरिए पनि कानुन विपरीत लुकिछिपि सिनेमा चलाइरहेको जानकारीमा आएको बोर्डले प्रष्ट पारेको छ । 

गैरकानुनी रुपमा रहेका हललाई कारबाही गर्ने बोर्डले प्रतिबद्धता जनाएको छ । 

• ‘पूर्ण बहादुरको सारङ्गी’ २० वटा हलबाट उतारिँदै (हलको सूचीसहित) 

यता, सिनेमा हलहरूको छाता संस्था नेपाल चलचित्र संघले भने सेभेन सिसलाई कारबाही गर्ने चेतावनी दिएको छ । बिनाप्रमाण गलत व्यापारिक तथ्यांक दिएको भन्ने आरोप लगाएको भन्दै प्रमाण लिएर उपस्थित हुन ‘पूर्ण बहादुरको सारङ्गी’का निर्मातालाई निर्देशन दिएको छ । 

प्रमाणबिना गलत आरोप लगाएको भन्दै संघले चलचित्र संघका सदस्यहरूको मानमर्दन गरेको बताएको छ । संघले ‘पूर्ण बहादुरको सारङ्गी’का निर्मातालाई कारबाहीको चेतावनी समेत दिएको छ । 

बोर्डले इजाजत खारेज गरिसकेका हलको बचाउमा उत्रिएको संघको विज्ञप्तिबाट प्रष्ट हुन्छ । संघले चलचित्रको व्यापारिक रिपोर्ट माग्ने र चलचित्र चलाउने वा उतार्ने अधिकार निर्मातामा नभएर वितरकमा हुने पनि विज्ञप्तिमा उल्लेख गरेको छ ।