काठमाडौं । चितवन राइनोजले आगामी नेपाल प्रिमियर लिग (एनपीएल)को पहिलो सिजनका लागि इंग्ल्यान्डका अन्तर्राष्ट्रिय खेलाडी रवि बोपारालाई अनुबन्ध गरेको छ । 

उनले इंग्ल्यान्डबाट ट्वान्टी–२०, एकदिवसीय र टेस्ट क्रिकेटमा गरी १७१ अन्तर्राष्ट्रिय खेल खेलेका छन् ।

विश्वभरका विभिन्न लिग खेलिसकेका दायाँ हाते ब्याटर बोपाराले टी–२० ब्लास्ट र हन्ड्रेडमा पाँच हजारभन्दा बढी रन बनाएका छन् । उनले बंगलादेश प्रिमियर लिगमा एक हजार १०९ रन, पाकिस्तान सुपर लिगमा ७७५ रन र भारतको इन्डियन प्रिमियर लिगमा ५३१ रन बनाएका छन् । 

“नेपालमा क्रिकेटको क्रेज र जोश अब सबैका लागि ओपन सेक्रेट बनिसकेको छ । हरेक क्रिकेटर नेपालमा पुग्न र संसारका सबैभन्दा जोशिला समर्थकहरू सामु खेल्न चाहन्छन् । म चितवन राइनोजको जर्सी लगाएर तपाईं सबैलाई मनोरञ्जन दिने कुरा गर्न अत्यन्त उत्साहित छु,” सम्झौतापछि बोपाराले भने । 

“रवि बोपाराको ट्रयाक रेकर्ड आफैंले बोल्छ, उनी एक प्रमाणित अनुभवी खेलाडी हुन् । उनको उपस्थितिले टोलीको क्षमता र सन्तुलनलाई मात्र सुधार्ने छैन, उनका अनुभव र नेतृत्वले एक उत्कृष्ट मित्रता निर्माण गर्न मद्दत गर्नेछ,” बोपारासँग सम्झौतापछि चितवन राइनोजका निर्देशक आयुष न्यौपानेले भने ।