काठमाडौं । फिफा विश्वकप २०२६ छनोट खेलमा पराग्वेसँग अर्जेन्टिना २–१ ले स्तब्ध बनेको छ ।

शुक्रबार बिहान पराग्वेमा भएको खेलमा घरेलु टिमलाई जित दिलाउन एन्टोनियो सानाब्रिया र ओमार अल्डेरेटले गोल गरे । अर्जेन्टिनाका लौटारो मार्टिनेजले गोल गरे पनि टिमको हार टार्न सकेनन् ।

खेलमा अर्जेन्टिनाले पहिले अग्रता बनाए पनि त्यसलाई जोगाउन सकेन । मार्टिनेजले ११औँ मिनेटमा गोल गर्दै घरेलु समर्थकमाझ पाहुना टिम अर्जेन्टिनालाई अग्रतामा राखेका थिए । तर, १९औँ मिनेटमा सानाब्रियाले गोल गर्दै पराग्वेलाई खेलमा फर्काएका थिए ।

४७औँ मिनेटमा अल्डेरेटले गोल गरेपछि पराग्वेले २–१ को अग्रता बनाएको थियो । यही गोल निर्णायक बन्दा पराग्वेले सन् २०२२ को विश्वकप विजेतालाई निराश बनाएको हो ।

विश्वकपको दक्षिण अमेरिकी छनोटमा अर्जेन्टिनाको यो तेस्रो हार हो । अर्जेन्टिना यसअघि उरुग्वे र कोलम्बियासँग हारेको थियो ।

जितसँगै ११ खेलबाट १६ अंक जोडेको पराग्वे तालिकाको छैटौँ स्थानमा उक्लिएको छ । समान खेलबाट ११ अंकको अर्जेन्टिना शीर्ष स्थानमा कायमै छ ।

ब्राजिल १–१ भेनेजुएला
छनोटअन्तर्गत शुक्रबारै भएको अर्को खेलमा ब्राजिल र भेनेजुएलाले १–१ को बराबरी खेल्दै अंक बाँडे । भेनेजुएलामा भएको खेलमा ब्राजिलले लिएको पहिलो अग्रता जोगाउन नसक्दा अंक बाँडेको हो ।

४३औँ मिनेटमा राफिन्हाले गोल गर्दै ब्राजिललाई अग्रता दिलाएका थिए । तर, ४६औँ मिनेटमा टेलास्को सेगोभियाले गोल गर्दै घरेलु टिमलाई खेलमा फर्काएका थिए ।

६२औँ मिनेटमा प्राप्त पेनाल्टी सदुपयोग गर्न नसक्दा ब्राजिलले तीन अंक जोड्ने अवसर खेर फाल्यो । पेनाल्टी प्रहारका निम्ति आएका फिनिसियस जुनियरले बललाई जाली चुमाउन सकेनन् ।

बराबरीमा रोकिए पनि एक अंक जोडेको ब्राजिल तेस्रो स्थानमा उक्लिएको छ । ब्राजिलले ११ खेलबाट १७ अंक जोडेको छ । समान खेलबाट १२ अंकको भेनेजुएला सातौँ स्थानमा छ ।

इक्वेडर ४–० बोलिभिया
शुक्रबारकै तेस्रो खेलमा इक्वेडरले बोलिभियाविरुद्ध ४–० को जित निकाल्यो ।