काठमाडौं । अफगानिस्तानको तालिवान सरकारले भारतमा आफ्नो पहिलो कूटनीतिक नियुक्ति गरेको छ । तालिवानले मुम्बईस्थित वाणिज्य दूतावासमा अफगान विद्यार्थीलाई कार्यवाहक राजदूत नियुक्त गरेको हो ।

तालिवानका उपमन्त्री शेर मोहम्मद अब्बास स्टनिकजाईले एक्समा पोस्ट गरेर हाफिज इक्रामुद्दीन कामिललाई मुम्बईस्थित अफगान वाणिज्य दूतावासमा राजदूत नियुक्त गरिएको जानकारी दिएका छन् । तर, एनडीटीभीको रिपोर्टका अनुसार तालिवानको निर्णयलाई भारतले अहिलेसम्म स्वीकृत गरेको छैन ।

तालिवान सरकारले नियुक्त गरेका कामिल सात वर्षदेखि भारतमा अध्ययनरत छन् । उनले दक्षिण एसिया युनिभर्सिटी, दिल्लीबाट अन्तर्राष्ट्रिय कानुनमा पीएचडी गरेका छन् । यसका लागि कामिललाई भारतीय विदेश मन्त्रालयले छात्रवृत्ति दिएको थियो ।

गत साता नोभेम्बर ६ मा विदेश मन्त्रालयका सहसचिव जेपी सिंहले अफगानिस्तानमा तालिवानका कार्यवाहक रक्षामन्त्री मुल्लाह मोहम्मद याकुबलाई भेटेका थिए । त्यसको ६ दिनपछि कामिललाई राजदूत नियुक्त गरेको जानकारी आएको हो ।

सन् २०२१ मा अफगानिस्तानमा तालिवान सत्तामा आएपछि भारतले आफ्ना कूटनीतिज्ञहरूलाई फिर्ता बोलाएको थियो । तर, त्यसपछि पनि भारतस्थित अफगान दूतावास र राजदूतले काम गरिरहेका थिए । तर, गत वर्ष सेप्टेम्बरमा अफगानिस्तानको दूतावासले भारतमा आफ्नो काम बन्द गरेको थियो ।

भारतीय सञ्चारमाध्यमबाट ।