काठमाडौं । कान्तिपुर मिडिया ग्रुपले यही कात्तिक २८ र २९ गते कान्तिपुर कन्क्लेभको आयोजना गरेको छ । सूचना संयन्त्रलाई थप जिम्मेवार बनाउन, प्रश्न र बहसलाई सघन बनाउन, जवाफदेहीताको पक्षमा आवाज सशक्त बनाउन र समग्रमा लोकतन्त्रलाई समृद्ध बनाउन सार्थक बहस र हस्तक्षेपलाई प्रवर्द्धन गर्न कान्तिपुर कन्क्लेभ २०२४ को आयोजना गरिएको ग्रुपले बताएको छ ।

‘डेमोक्रेसी इन डिलिमा’ अवधारणामा आयोजना हुने चौथो संस्करणको कन्क्लेभको बहसका १२ सत्रमा ५० वक्ता छन् । तीमध्ये १० जना विदेशी पाहुना छन् ।

शासन प्रणालीमाथिका प्रश्न, सार्वजनिक सेवा प्रवाहका मुद्दा, आर्थिक विकासका अवधारणा, नवप्रवर्तनका आयाम क्षेत्रीय सहकार्य र भूमण्डलका चुनौतीमाथि सार्थक बहसका लागि कान्तिपुर मिडिया ग्रुपले कन्क्लेभ आयोजना गर्दै आएको बताएको छ ।

संसारका आधाभन्दा धेरै बालिग जनसंख्याले देशको नेता र नीति छान्ने निर्वाचनमा भाग लिएका कारण यस वर्ष सन् २०२४ लोकतन्त्रका लागि उत्सवमय बनेको बताइएको छ । भारतदेखि अमेरिका, रुसदेखि बेलायत तथा अफ्रिकाको नाइजेरियादेखि दक्षिण अमेरिकाको अर्जेन्टिनासम्मका जनताले मतदानमार्फत देशको मार्गचित्र कोर्ने यात्रामा भाग लिँदा मतदातालाई प्रभावित गर्ने पपुलिजमुको लहर पनि विश्वभर चलेको आयोजकको भनाइ छ ।

सूचना प्रविधिको विकास, सामाजिक सञ्जालको विस्तार र आर्टिफिसियल इन्टेलिजेन्स (एआई)को क्षमता मानव जातिका लागि वरदान हुनुपर्नेमा प्रविधिको दुरुपयोग गरेर फेक न्युज, मिस्इन्फर्मेसन र डिस्इन्फर्मेसन फैलाएर समाजलाई दिग्भ्रमित गर्ने उद्यमले लोकतन्त्रको आयाममाथि चुनौती बढाएको ग्रुपको भनाइ छ । कन्क्लेभको बहस यिनै विषयमा केन्द्रित छ ।

कन्क्लेभको कि नोट स्पिचका लागि नोबेल पुरस्कार विजेता कैलाश सत्यार्थी छन् । कन्क्लेभको वक्ताका रूपमा प्रधानमन्त्री केपी शर्मा ओली, पूर्वप्रधानमन्त्री पुष्पकमल दाहाल ‘प्रचण्ड’ र सर्वाेच्च अदालतका प्रधानन्यायाधीश प्रकाशमानसिंह राउत छन् ।

भारतका पूर्वप्रमुख निर्वाचन आयुक्त एसवाई कुरेशी, राजनीतिशास्त्री प्रताप भानु मेहता, विल्सन सेन्टर अमेरिकाको साउथ एसिया इन्स्टिच्युटका निर्देशक माइकल कुगलम्यान, हुवाङचोङ विश्वविद्यालय चीनको इन्स्टिच्युट अफ स्टेट गभर्नेन्सका वाङ पेड द हिन्दुकी डिप्लोमेटिक अफेयर्स एडिटर सुहासिनी हैदर, भारतका राजनीतिक अभियन्ता योगेन्द्र यादव, बेलायती लेखक तथा पत्रकार थोमस बेल र अमेरिकी पत्रकार पिटर गिल विभिन्न सेसनमा सहभागी हुने कान्तिपुर मिडिया ग्रुपले जनाएको छ ।

कन्क्लेभको पहिलो दिन बुधबार क्रमशः दोबाटोमा लोकतन्त्र, नीति र समृद्धि, लोकरिझ्याइँको लहर, सामाजिक सञ्जालः दुईधारे तरबार, कलम र शक्तिः नेपाली लोकतन्त्र र पत्रकारिताका तीन दशक र प्रचण्डपथः सडक कि सत्ता ? शीर्षकमा बहस हुने बताइएको छ ।

दोस्रो दिन बिहीबार निर्वाचन सुधारः नीति कि प्रवृत्ति, भूराजनीतिक खलबल, मैदानमा महिला नायक, सीमापार समृद्धि, मुख्यमन्त्रीका मुख्य मुद्दा र प्रधानमन्त्रीसँग परिसंवाद शीर्षकमा सेनस हुने भएका छन् ।

वर्तमानका योजनाकार तथा भविष्यका स्वप्नद्रष्टा, देशभित्रका नीति निर्माता तथा क्षेत्रीय र अन्तर्राष्ट्रिय सरोकारवाला, विचारकहरूको बृहत् मञ्च कान्तिपुर कन्क्लेभमा समस्याको जड खोज्ने मात्र नभई समाधानको प्रारूपमा पनि बहस गरिने मिडिया ग्रुपले बताएको छ ।

कन्क्लेभमा एनआईसी एसिया बैंकको मुख्य प्रायोजन र एसियन पेन्टस्को सह–प्रायोजन छ ।