काठमाडौं । इंग्लिस क्रिकेटर स्टेफन इस्किनाजीले नेपाल प्रिमियर लिग (एनपीएल)मा काठमाडौं गुर्खाजबाट खेल्ने भएका छन् । काठमाडौं स्पोर्टस डेभलपमेन्ट भेन्चरको स्वामित्वमा रहेको काठमाडौं गुर्खाजले इंग्लिस क्रिकेटमा जमेका यी विकेटकिपर ब्याटरलाई लिएको हो ।

दक्षिण अफ्रिकामा जन्मेर अस्ट्रेलियामा हुर्किएका ३० वर्षीय इस्किनाजीले मिडलसेक्सबाट इंग्लिस क्रिकेट काउन्टी खेल्दै आएका छन् । उनले ८८ प्रथम श्रेणीको क्रिकेटमा नौ शतकका साथ ४३ सय भन्दा बढी रन बनाएका छन् ।

ग्लोबल फ्रेन्चाइज लिगमा इस्किनाजीले आफूलाई आक्रामक खेलाडीको रूपमा प्रमाणित गरिसकेका छन् । 'द हन्ड्रेड'मा उनको स्ट्राइक रेट १५१ माथि र भाइटालिटी ब्लास्टमा उनको स्ट्राइक रेट १४० माथिको रहेको छ । 'द हन्ड्रेड'मा वेल्स फायरबाट खेल्दै इस्किनाजीले १० खेलमा २६६ र भाइटालिटी ब्लास्टमा ८७ खेलमा एक शतक र १८ अर्धशतकका साथ २५ सय भन्दमा बढी रन बनाएका छन् ।

"नेपाल प्रिमियर लिगमा उनको अनुभव र आक्रामक स्वभावको ब्याटिङ काठमाडौं गुर्खाजलाई निकै उपयोगी हुने विश्वास हामीले लिएका छौँ । नेपालमा चिसो मौसम इंग्ल्यान्डका खेलाडीका लागि निकै सुहाउँदो हुने भएकाले हामी इस्किनाजी सफल हुने अपेक्षा हामीले गरेका छौँ," काठमान्डौं गुर्खाजका प्रमुख कार्यकारी अधिकृत सन्देश कटवालले भने ।

इस्किनाजीले पर्थ स्कोरचर्सबाट बिग बासमा खेलेका छन् । उनले बिग बासको १३ खेलमा २५८ रन बनाएका छन् । उनीसँग यसबाहेक बंगलादेश प्रिमियर लिग र अवुधावी टी १० लिगको पनि अनुभव छ ।

काठमाडौं गुर्खाजले अनुबन्धन गरेको उनी तेस्रो विदेशी खेलाडी हुन् । नेदरल्यान्ड्सका ओपनर माइकल लेभिट र नामिबियाका कप्तान मर्वी जेड इरसमसलाई गुर्खाजले यसअघि नै अनुबन्धन गरिसकेको छ ।

काठमाडौं गुर्खाजको ‘मार्की' खेलाडीमा करण केसी छन् । अक्सनबाट गुर्खाजले शाहव आलम, भीम सार्की, रशिद खान, शंकर राना, कृष्ण कार्की, दीपेश कँडेल, सुमित महर्जन, राजु रिजाल, विवेक केसी र प्रतिक श्रेष्ठलाई लिएको थियो ।