काठमाडौं । नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले भ्रष्टाचारविरोधी अभियान चलाएकै कारण आफू सत्ताबाट हट्नुपरेको बताएका छन् । बिहीबार भक्तपुरमा आयोजित एक कार्यक्रममा बोल्दै उनले यस्तो बताएका हुन् ।

उनले सामाजिक न्यायको पक्षमा, आर्थिक समस्या समाधानको लागि जनताको पक्षमा काम गरेकै कारण पुराना र ठूला पार्टीहरूले भ्रष्टाचारी बचाउनकै लागि तथाकथित संख्याको बलमा आफूलाई सत्ताच्युत गरेको दाबी गरे ।

आफूले गरेका कामहरू राम्रोसँग जनतालाई बुझाउने अवसरका रूपमा आफूले लिएको उल्लेख गरे । आफूलाई जनताले अहिले धेरै नै माया गरेको महसुस हुने गरेको बताए ।

उनले भने, "हामीले भ्रष्टाचारविरोधी अभियान चलाएकै कारण, सामाजिक न्याय, आर्थिक समस्या समाधानको लागि जनताको पक्षमा काम गरेकै कारण पुराना र ठूला पार्टीहरूले भ्रष्टाचारी बचाउनकै लागि तथाकथित संख्याको बलमा हामीलाई बाहिर जान बाध्य पारे । यसलाई हामीले दुःख मनाउ गरेका छैनौँ । अब आफूले गरेका काम जनतालाई राम्रोसँग बुझाउने अवसर हो यो ।"

प्रचण्डले फेरि माओवादीको नेतृत्वमा एकपटक सरकार बनेको हेर्न जनताले चाहेको बताए ।