भरतपुर । नेकपा (एमाले)का महासचिव शंकर पोखरेलले सहकारी प्रकरणमा परेका नेतालाई छानबिन गर्न पाइँदैन भनेर जुलुस निकाल्ने पार्टीले सुशासनको कुरा गर्न नसुहाएका छन् ।

विभिन्न चाडपर्वका अवसरमा एमाले चितवनले आज आयोजना गरेको शुभकामना आदानप्रदान कार्यक्रममा उनले एमालेले पार्टीका कुनै पनि नेतालाई अनुसन्धान नगर भनेर आन्दोलन र जुलुस ननिकालेको तर नयाँ भनिएकाले यस्तो गरिररहेकामा आपत्ति जनाए ।

महासचिव पोखरेलले भने, “सहकारी प्रकरणमा एमाले नेतृत्वको सरकारले कसैलाई अन्याय गर्‍यो कि भन्ने लाग्न सक्छ । तर, व्यक्तिकेन्द्रित छानबिन नगरौँ भन्ने पार्टीले त्यस्तो गर्न सक्दैन । छानबिन समिति सबै दलको सहभागितामा निर्माण गरिएको हो । तीमध्ये दुई पार्टी सत्ता र तीन पार्टी प्रतिपक्षमा रहेका छौँ, सबैको सर्वसम्मतिमा प्रतिवेदन तयार भएको र सरोकारवाला निकायले अनुसन्धान अघि बढाएको कुरालाई प्रतिशोध भनेर उचाल्नु राम्रो होइन ।”
 
यसैगरी, उनले नयाँ भनेका पार्टीभन्दा पुरानै पार्टीले बरु न्यायालयप्रति सम्मान गरेर सहयोग गर्दै आएको  धारणा राखे । “कांग्रेस–एमालेले कुनै पनि काण्डमा अनुसन्धानको प्रक्रिया रोक्न नाराजुलुस गरेका छैनन् । तर, नयाँ भनिएका पार्टीले ठगी प्रकरणमा परेकालाई छानबिन गर्न पाइँदैन भनेर आन्दोलन गरिरहेका छन् । यो राम्रो भएन,” महासचिव पोखरेलको भनाइ थियो ।

पटकपटक नेपालको लोकतान्त्रिक परिवर्तनको अगुवाइ गरेको चितवन कुनै पनि बहकाउमा नलाग्ने उनले विश्वास व्यक्त गरे । रासस