काठमाडौं । अमेरिकी अखबार वासिङ्गटन पोस्टले कमला ह्यारिसलाई अमेरिकी राष्ट्रपतिका रूपमा समर्थन गर्न तयार पारेको इडिटोरियल (सम्पादकीय) यसका मालिक एवं अमेजोनका संस्थापक जेफ बेजोसले रोकेका छन् ।

मालिकको हस्तक्षेपपछि उक्त सम्पादकीयको ठाउँमा पोस्टका प्रकाशक विल लुइसको स्तम्भ प्रकाशित भएको वासिङ्गटन पोस्टले उल्लेख गरेको छ । उक्त लेखमा लुइसले पोस्टले सन् १९६० मा जोन एफ केन्नेडी र रिचर्ड निक्सन प्रतिस्पर्धामा हुँदा कसैलाई समर्थन नगरेको विषयमा पनि उल्लेख गरिएको छ ।

निक्सन त्यसपछि अमेरिकी इतिहासको ठूलो राजनीतिक भ्रष्टाचारकाण्ड वाटरगेट स्क्यान्डलमा मुछिएका थिए । उनीविरुद्ध कयौँ मुद्दा एवं आपराधिक आरोप लागेको थियो ।

“हामी बुझ्छौँ कि यसलाई एक उमेदवारको मौन समर्थन, अरुको निन्दा वा जिम्मेवारी त्यागिएको लगायत विभिन्न तरिकाले पढिनेछ,” लुइसले लेखेका छन्, “यो अपरिहार्य छ र हामी त्यसरी हेर्दैनौँ । पोष्टले सधैँ एक नेतामा अमेरिकी सेवाका लागि चरित्र, लगाव, नीतिको शासनको लागि सम्मान र मानव स्वतन्त्रताको सबै पक्षको सम्मान जस्ता विषय हुनुपर्ने कुरामा अडिग छ ।”

कमला ह्यारिसको पक्षमा लेखिएको समर्थन ‘किल’ गर्ने वासिङ्गटन पोस्ट दोस्रो पत्रिका बनेको छ । यसअघि द लस एन्जेलस टाइम्सले पनि लेखिएको सम्पादकीय रोकेको बताइएको छ ।