काठमाडौं । नवलपरासी (बर्दघाट सुस्ता पूर्व)मा हत्या आरोपमा प्रहरीले एक युवकलाई पक्राउ गरेको छ । पक्राउ पर्नेमा देवचुली नगरपालिका–९, विशालटारका २९ वर्षीय अर्जुन नेपाली छन् ।

सोही ठाउँका २९ वर्षीय मिलन मानन्धरको हत्या गरेको उनीमाथि आरोप छ । शुक्रबार (हिजो) राति उनलाई पक्राउ गरिएको प्रहरी प्रधान कार्यालयले जानकारी गराएको छ ।

अर्जुनले धारिलो हतियार प्रहार गर्दा मिलन गम्भीर घाइते भएका भन्ने सूचनापछि प्रहरी टोली खटिएको थियो । लगत्तै उनलाई पक्राउ गरिएको हो ।

हतियार प्रहारबाट गम्भीर घाइते मिलनको उपचारका क्रममा भरतपुर अस्पतालमा मृत्यु भएको प्रहरीले जनाएको छ ।