काठमाडौं । नेकपा (एकीकृत समाजवादी)का नेता वंशिधर मिश्रले पार्टीलाई नेकपा(एमाले)सँग एकीकरण गर्नुपर्ने बताएका छन् । एकीकृत समाजवादीले विद्रोहको औचित्य पुष्टि गर्न नसकेको भन्दै नेता मिश्रले एमालेसँग पार्टीको एकीकरण गर्नुपर्ने बताए ।

शनिबार न्युज एजेन्सी नेपालसँगको कुराकानीका क्रममा उनले पार्टी फुटको कारणलाई हल गर्दै एकीकरण गर्नुपर्ने बताए । उनले तत्कालीन पार्टी एमाले फुट्दै गर्दा नयाँ पार्टीमा कुनै पनि त्रुटि, कमीकमजोरी र असन्तुष्टि नहोस् भन्ने आफूहरूको अपेक्षा रहेको भए पनि त्यस्तो हुन नसकेको बताए ।

उनले पार्टीको दसौँ महाधिवेशनको म्यान्डेटविपरीत मनोनीत केन्द्रीय सदस्यहरूले पदाधिकारी र पोलिट ब्युरो सदस्य चयन गरिएको भन्दै त्यसमा आफूहरूको असन्तुष्टि रहेको बताए ।

पार्टीभित्र दुई पक्ष हाबी भएको भन्दै उनले पार्टी संकटमा रहेको बताए । नेता मिश्रका अनुसार, पार्टीको औचित्य सकिएकाले नयाँ पार्टी बनाउनुपर्छ भन्ने एउटा पक्ष र सुधार गरेर यही पार्टी बनाउनुपर्छ भन्ने अर्को पक्ष पार्टीभित्र छ ।

"एउटा समुह यसैलाई करेक्सन गर्नुपर्छ, फेरि महाधिवेशन बोलाउने हो कि, यसलाई विघटन नै गर्ने हो कि ? नयाँ ढंगले जानुपर्छ कि भन्नेमा छ । अर्को तेस्रो पक्ष जो संस्थापन धार छ, उसले के भन्दै छ भने जे भयो भयो यसलाई सकेसम्म सहिष्णुता, सुधार गर्दै नयाँ जिम्मेवारी बाँड्दै जानुपर्छ भनेर छिट्टै केन्द्रीय कमिटीको बैठक बोलाउने कुरा भइराखेको अवस्था छ । नेकपा(एकीकृत समाजवादी) पार्टी संकटमा छ," उनले भने ।