काठमाडौं । साफ महिला च्याम्पियनसिपका निम्ति नेपाल आएको भारतीय महिला फुटबल टिमकी कप्तान आशालता देवीले नेपाली समर्थकको प्रशंसा गरेकी छन् । आशालताले प्रतियोगिताको पूर्वसन्ध्यामा आयोजित पत्रकार सम्मेलनमा मैदानमा समर्थकको उत्साहपूर्ण साथले पनि नेपाली टिमको प्रदर्शन राम्रो हुँदै गएको बताइन् ।

“मलाई यहाँ धेरै राम्रो लाग्छ । यहाँका समर्थक क्रेजी छन् । २०१९ मा विराटनगरमा भएको साफ च्याम्पियनसिपको फाइनलमा पूरा मैदान समर्थकले भरिएको थियो । समर्थकको उत्साहपूर्ण सहभागिताले हामीलाई पनि अझ राम्रो खेल्न प्रेरित गर्छ,” उनले भनिन् ।

उनी अगाडि थप्छिन्, “एक फुटबल खेलाडीको रूपमा म उहाँहरूलाई निकै सम्मान गर्छु । उहाँहरूले नेपालको महिला फुटबललाई निकै राम्रो साथ दिइरहनुभएको छ । उहाँहरूको कारणले पनि नेपालको महिला फुटबल धेरै राम्रो हुँदै गएको छ । मलाई नेपाली टिमको समर्थन देखेर यहाँ खेल्न धेरै राम्रो लाग्छ ।”

त्रिपुरेश्वरस्थित दशरथ रंगशालामा हुने प्रतियोगिता बिहीबारदेखि सुरु हुँदै छ । नेपालले लगातार तेस्रोपटक साफ महिला च्याम्पियनसिप आयोजना गर्न लागेको हो । यसअघि, सन् २०१९ संस्करण विराटनगरमा र २०२२ को संस्करण दशरथ रंगशालामा आयोजना भएको थियो । 

प्रतियोगितामा भारत समूह ‘ए’ मा छ । यस समूहमा भारतसँगै पाकिस्तान र बंगलादेश छन् । यस्तै, समूह ‘बी’ मा घरेलु टिम नेपालसँगै, माल्दिभ्स, भुटान र श्रीलंका छन् । 

प्रतियोगितामा भारतले बिहीबार उद्घाटन खेलमा पाकिस्तानसँग खेल्ने तालिका छ । यो खेल अपराह्न ५ः३० बजेदेखि सुरु हुने तालिका छ ।