काठमाडौं । फिफा विश्वकप–२०२६ छनोटमा सहज जित निकाल्ने क्रममा ब्राजिलले पेरुविरुद्ध ४–० को जित निकालेको छ ।

बुधबार बिहान ब्राजिलमै भएको खेलमा घरेलु टिमलाई जित दिलाउन राफिन्हाले दुई गोल गरे । यस्तै, आन्द्रेयस पेरेरा र लुईज हेनरिकले समान एक गोल थपे । खेलको ३८औँ मिनेटमा राफिन्हाले पेनाल्टीमार्फत गोल गर्दै ब्राजिललाई अग्रतामा राखेका थिए । ५४औँ मिनेटमा प्राप्त अर्को पेनाल्टीलाई राफिन्हाले नै सदुपयो गरेपछि ब्राजिलले अग्रता दोब्बर बनायो ।

७१औँ मिनेटमा पेरेराले घरेलु टिमका लागि तेस्रो गोल गरे । त्यसको तीन मिनेटपछि हेनरिकले गोल गरेपछि ब्राजिलले घरेलु समर्थकमाझ ४–० को सहज जित पक्का गरेको हो । जितसँगै १० खेलबाट १६ अंक जोडेको ब्राजिल छनोटको चौथो स्थानमा छ । छनोटमा ब्राजिलको यो पाँचौ जित हो । यस्तै, समान खेलबाट ६ अंक जोडेको पेरु भने तालिकाको नवौँ स्थानमा छ ।