काठमाडौं । नेपालमा हुने एसियाकै ठूलो रग्बी प्रतियोगिता एसिया रग्बी इमिरेट्स सेभेन्सट्रफी–२०२४ का निम्ति नेपाली राष्ट्रिय टिमको घोषणा भएको छ ।

प्रतियोगिताका निम्ति नेपाल रग्बी संघले आइतबार महिला र पुरुष दुवैतर्फ समान १६ सदस्यीय राष्ट्रिय टोली सार्वजनिक गरेको हो ।

एसिया रग्बीको आयोजना र नेपाल रग्बी संघको व्यवस्थापनमा प्रतियोगिताका असोज १८ र १९ गते त्रिपुरेश्वरस्थित दशरथ रंगशालामा सञ्चालन हुने छ । जसमा महिला र पुरुष गरी कुल १७ राष्ट्रले प्रतिस्पर्धा गर्ने छन् ।

संघले घोषणा गरेको पुरुष टिममा विवेश बासु, सविन महत, क्याल्भिन जोशी, विराट श्रेष्ठ, यदु अधिकारी, निरोज कार्की, विक्रम पुरी, नविनबहादुर मगर, गणेश बाँनिया, रोहन डंगोल, विजय खड्का र कपिल ठकुरी छन् । यस्तै, विनोदबहादुर शाही, मशेष सुनार, सञ्जय अधिकारी र प्रमेश चौधरी वैकल्पिकमा छन् ।

महिलातर्फ आशा कुँशार, पुनम भुजेल श्रेष्ठ, सुस्मिता क्षेत्री, अनु शेर्पा, विशाकामार्किन राई, रोजिना पोखरेल, विनिता शाही ठकुरी, सुजा राई, मनिषा घिसिङ, मनिषा थापामगर, कमला राई र सिर्जना राई छन् । यस्तै, वैकल्पिकमा संगिता घिसिङ, सावित्री पुर्जा, सिर्जना छन्त्याल र अप्सरा कार्की छन् ।

नेपालमा एसियालीस्तरको सिनियर रग्बी प्रतियोगिता हुन लागेको यो पहिलोपटक हो । यस प्रतियोगिताका लागि नेपालले पछिल्लो तीन महिनादेखि पोखरामा तयारी गरिरहेको छ ।

प्रतियोगिताको च्याम्पियन महिला तथा पुरुष टोलीले एसिया रग्बीको ट्रफीसहित स्वर्ण पदक, दोस्रो हुनेले रजत र तेस्रो हुने टोलीले कास्य पदक प्राप्त गर्नेछन् ।

यो प्रतियोगिता २०२५ मा हुने एसिया रग्बी सेभेन्स सिरिजको छनोटको रुपमा समेत रहको छ । काठमाडौंमा हुने एसिया रग्बी सेभेन्स ट्रफीको महिला र पुरुषतर्फको विजेताले २०२५ मा हुने एसिया रग्बी सेभेन्स सिरिजमा स्थान बनाउने छन् । जसले गर्दा यो प्रतियोगिता अझ बढी प्रतिस्पर्धात्मक हुने अपेक्षा गरिएको छ ।

नेपाली टिमले सन् २०१५ को प्रिओलम्पिकक्वालिफायर र सन् २०१६ देखि एसिया रग्बी सेभेन्स ट्रफीमा सहभागी हुँदै आएको छ । गतवर्ष कतारमा सम्पन्न भएको प्रतियोगितामा नेपालको पुरुष टोलीले साउदी अरेबिया र कीर्गिस्तानलाई हराएको थियो । नेपालले विश्व रग्बीको पूर्ण सदस्यता पाए लगत्तै सन् २०२२ मा बंगलादेशमाबंगबन्धु कप खेल्दै रग्बी फिफ्टिन्समा पनि डेब्यु गरेको थियो ।

नेपालले यो प्रतियोगिताबाट आफ्नो वरीयता सुधारसँगै बल च्याम्पियन बन्ने लक्ष्य राखेको नेपाल रग्बी संघले छ । कार्यक्रमको उद्घाटन अमेरिकाबाट फर्किएपछि प्रधानमन्त्री केपी शर्मा ओलीले गर्ने तयारी रहेको रग्बी संघले जनाएको छ ।