काठमाडौं । शुक्रबारदेखि आएको बाढीपहिरोले निजी क्षेत्रका १६ आयोजनामा क्षति पुगेको छ । स्वतन्त्र ऊर्जा उत्पादकहरूको संस्था नेपाल (इप्पान)ले दिएको तथ्यांकअनुसार ६६१.६९ मेगावाट क्षमताका १६ आयोजनामा क्षति पुगेको हो ।

बाढीका कारण क्षतिग्रस्त जलविद्युत् आयोजनको प्रारम्भिक विवरण मात्रै आएको जनाइएको छ । बाढीका कारण मान्डू हाइड्रो पावर प्रवर्द्धक रहेको २२ मेगावाट क्षमताको वाग्मती साना जलविद्युत् आयोजनाको पावर हाउस डुबेको छ । माउन्टेन हाइड्रो नेपालको प्रवर्द्धक रहेको २२.१ मेगावाट क्षमताको तल्लो हेवाखोला जलविद्युत् आयोजना पावर हाउस डुबेको छ । अघिल्लो वर्षको बाढीमा पनि यस आयोजनामा क्षति पुगेको थियो ।

पाँचथर पावर कम्पनी प्रवर्द्धक रहेको १४.९ मेगावाट क्षमताको हेवाखोला जलविद्युत् पुनर्निर्माण सकेर सञ्चालनमा आउनै लाग्दा पुनः क्षति पुगेको छ । साहस ऊर्जा कम्पनी प्रवर्द्धक रहेको ८६ मेगावाट क्षमताको सोलु दूधकोसी आयोजनाको हेडवर्क्समा क्षति पुगेपछि उत्पादन बन्द भएको छ ।

यता, सगरमाथा जलविद्युत् कम्पनी प्रवर्द्धक रहेको तीन मेगावाट क्षमताको माइखोला क्यास्केड जलविद्युत् बाँध र टेलरेसमा क्षति पुगेपछि उत्पादन बन्द भएको छ । सगरमाथा कम्पनीकै ९.६ मेगावाट क्षमताको माइखोला जलविद्युत्को प्रसारण लाइन र बाँधमा क्षति पुगेपछि उत्पादन बन्द छ ।

फेमे खोला जलविद्युत् एक मेगावाट क्षमता रहेको आयोजनाको बाँध र विद्युत्गृह पूर्ण रूपमा क्षति पुगेको छ ।

पाँच मेगावाट क्षमता रहेको सिउरीखोला जलविद्युत् आयोजनाको टेलरेस, इन्टेक र टनेलमा क्षति पुगेपछि उत्पादन ठप्प छ । ४० मेगावाट क्षमताको सुपरन्यादी जलविद्युत् आयोजनाको पुहँचमार्ग र प्रोटेक्सन वालमा क्षति पुगेको छ । २५ मेगावाट क्षमताको इलेपखोला तातोपानी जलविद्युत् पहुँचमार्गमा क्षति पुगेको छ ।

२१६ मेगावाट क्षमताको त्रिशूली–१ जलविद्युत् आयोजनाको क्याम्प हाउस, पहुँचमार्गमा क्षति पुगेको छ भने तीनवटा कन्टेनर बगाएको छ ।

१० मेगावाट क्षमताको हेवाखोला जलविद्युत् आयोजनाको प्रसारणलाइनको टावर ढलेको छ । यस्तै, पावरहाउसमा जडानको लागि ल्याइएका सामग्री बगाएको छ ।

१५.१ मेगावाट क्षमताको सभाखोला ‘बी’ जलविद्युत् आयोजनाको पहुँचमार्ग र पावरहाउस परिएको छ । ६.३ मेगावाट क्षमताको सभाखोला ‘सी’ जलविद्युत् आयोजनाको पहुँचमार्गमा क्षति पुगेको छ ।

८६.५९ क्षमताको लान्द्रक मोदी जलविद्युत् आयोजनाको पहुँच मार्गमा क्षति पुगेको छ । यस्तै, १०० मेगावाट क्षमताको सुपर त्रिशूली जलविद्युत् आयोजनाको दुईवटा स्काभेटर र लोडर बगाएको छ । यस्तै, पावर हाउस स्काभेसन पुरिएको इप्पानले जनाएको छ ।