काठमाडौं । निजी क्षेत्रको दूरसञ्चार सेवाप्रदायक एनसेलले विपद्को घडीमा निःशुल्क डेटा प्रदान गरेको छ । विपद्को घडीमा सञ्चार सेवा निश्चित गर्न निःशुल्क डेटा प्रदान गरिएको एनसेलले जानकारी गराएको छ ।

“भारी वर्षाका कारण सिर्जना भएको यस अप्ठेरो स्थितिलाई ध्यानमा राख्दै एनसेलले असोज १२, २०८१ शनिबार बिहानैदेखि लगातार वर्षाका कारण भएको बाढी र पहिरोबाट प्रभावित क्षेत्रका आफ्ना ग्राहकहरूलाई निःशुल्क डेटा उपलब्ध गराइसकेको छ,” एनसेलद्वारा शनिबार जारी विज्ञप्तिमा उल्लेख छ ।

यसले आफ्ना ग्राहकलाई परिवार, आफन्तजन, साथीभाइसँग सम्पर्कमा रहिरहन, महत्त्वपूर्ण जानकारी प्राप्त गर्न र तुरुन्तै आवश्यक सहयोगका निम्ति सम्पर्क गर्न र सुरक्षित रहन सहयोग गर्ने एनसेलले विश्वास लिएको छ ।

निःशुल्क डेटा उपलब्ध गराउनुका साथै कम्पनीले हालको अवस्थाको मूल्यांकन गरिरहेको र क्षतिको विस्तृत जानकारी प्राप्त गरेपछि राहत प्रयासमा थप योगदान गर्ने प्रतिबद्धता जनाएको छ ।

“नेपाली जनताको सुरक्षालाई सुनिश्चित गर्न र नेपाल सरकारको प्रयासमा सहयोग गर्न एनसेल विभिन्न विपद् व्यवस्थापनमा काम गर्ने निकायहरूसँग समन्वय र सहकार्य गरिरहेको छ,” विज्ञप्तिमा उल्लेख छ ।

बाढीपहिरोबाट प्रभावित सबैमा एनसेल परिवारका तर्फबाट सहानुभूति व्यक्त गरिएको छ । पुनर्स्थापनाका निम्ति एनसेलले सकेको सहयोग गरिरहेको जनाइएको छ ।

“एक करोड ३० लाखभन्दा बढी ग्राहकलाई सञ्चार सेवा प्रदान गर्ने कम्पनी एनसेल, एक नेटवर्क सेवाप्रदायक मात्र नभई नेपाल र नेपाली समुदायहरूको एक अभिन्न अंग हो । हाम्रो सेवा ग्राहकलाई अनलाइन राख्न मात्र सीमित नभईे यी सेवाको साथ ग्राहकले आवश्यक सुरक्षा पाउन, राहत प्रयासहरू समन्वय गर्न र महत्त्वपूर्ण व्यक्तिहरूसँग सम्पर्कमा रहन मद्दत पुर्‍याउने हो,” विज्ञप्तिमा भनिएको छ, “यस किसिमको विपद्को समयमा हामी एनसेल तपाईंको साथमा छौँ र आवश्यक सहयोग गर्न प्रतिबद्ध पनि छौँ ।”