विराटनगर । विराटनगरमा विद्यालय नाटक महोत्सवको चौथौ संस्करण सम्पन्न भएको छ । सोमबार रंगेलीको श्री एकता सेकेन्डरी स्कुलका विद्यार्थीले भवानी भिक्षुको कथामाथि रमेशचन्द्र अधिकारीको निर्देशनमा ‘सावित्रीको बाख्रो’ नाटक मञ्चन गरेका थिए । 

आरोहण गुरुकुल विराटनगरको आयोजनामा १० दिनसम्म चलेको महोत्सवमा आयोजक र नौ विद्यालयका एक/एक गरी दशवटा नाटक मञ्चन भएका थिए । महोत्सवमा सहभागी भएकामध्ये पूर्वाञ्चल विद्या सदन बोर्डिङ स्कुलको नाटक ‘एक पटक बोलेको एक रुपियाँ’ले उत्कृष्टको अवार्ड पायो ।

रंगकर्मीद्वय उद्धव सापकोटा र दिपा पोखरेलको निर्णायक टिमले आदर्श माध्यमिक विद्यालयको नाटक ‘भविष्य निर्माण’का निर्देशक प्रनिशा रेग्मीलाई उत्कृष्ट निर्देशक घोषित गर्‍यो ।

यस्तै, पूर्वाञ्चल स्कुलकै नाटकमा अभिनय गर्ने सुदेश चौधरी उत्कृष्ट अभिनेता र ग्रेडेडइङ्लिस मिडियम सेकेन्डी स्कुलको नाटक ‘बुद्धिमानी आमा’माअभनिय गर्ने सिमरन सुवेदी उत्कृष्ट अभिनेत्री घोषित भए ।

अवार्ड विजेताहरूलाई मोरङ प्याब्सनका अध्यक्ष प्रेमराज सिंह सुवाल, गुरुकुलका अध्यक्ष भैरव क्षेत्री लगायतले सम्मान र प्रमाणपत्र प्रदान गरे ।

विराटनगर महानगरपालिकाको प्रवर्धनमा भएको महोत्सव भदौ २२ गते आयोजक गुरुकुलको ‘नीलाम्बरकोआकाशयुद्ध’ मञ्चनसँगै सुरु भएको थियो । त्यसपछि क्रमशः ग्रेडेड स्कुलले ‘बुद्धिमानी आमा’, दिल्ली पब्लिक स्कुलले ‘छिमेकी’, आदर्श स्कुलले ‘भविष्य निर्माण’, ग्रिनल्यान्ड सेकेन्डरी स्कुलले ‘रङ’, पूर्वाञ्चल स्कुलले ‘एकपटक बोलेको एक रुपियाँ’ मञ्चन गरे ।

यस्तै, नमुना विद्या मन्दिरले ‘जिम्मेवारी कसको ?’, मोरङ ज्ञानोदय सेकेन्डरी इङ्लिस स्कुलले ‘स्मार्ट बन्द’, सुबिजिमुर मेमोरियल सेकेन्डरी स्कुलले ‘ज्ञ’, श्री एकता सेकेन्डरी स्कुलले ‘सावित्रीको बाख्रो’ मञ्चन गरे ।

विद्यार्थीलाई रंगमञ्चसँग जोड्ने उद्देश्यले गुरुकुलले हरेक वर्ष विद्यालय नाटक महोत्सव गर्दै आएको छ ।