काठमाडौं । नेकपा (माओवादी केन्द्र)का राष्ट्रियसभा सदस्य विष्णुबहादुर विश्वकर्माले प्रतिनिधिसभाका सभामुख देवराज घिमिरे नेकपा (एमाले) कार्यकर्ताको भूमिकामा देखिएको आरोप लगाएका छन् । सभामुख घिमिरेले हिंसा शब्द असंसदीय भएको भन्दै गरेको निर्णयप्रति आपत्ति जनाउँदै उनले यस्तो आरोप लगाएका हुन् ।

आइतबार राष्ट्रियसभा बैठकमा विशेष समय लिएर सांसद विश्वकर्माले सभामुख घिमिरेले हिंसा शब्दलाई संसद्को रेकर्डबाट नहटाउने निर्णय गरेर एमाले कार्यकर्ताका रूपमा प्रस्तुत भएको बताए ।

प्रतिनिधिसभा बैठकमा एमालेका सांसद योगेशकुमार भट्टराईले हिंसा शब्द प्रयोग गरेका थिए । उक्त शब्द असंसदीय भन्दै माओवादी केन्द्रका सांसदले संसद्को रेकर्डबाट हटाउन माग गरेका थिए । तर, सभामुख घिमिरेले हिंसा शब्द असंसदीय नभएको भन्दै रेकर्डबाट हटाउन नपर्ने निर्णय गरेका थिए ।

सोही विषय उल्लेख गर्दै सांसद विश्वकर्माले सभामुख घिमिरे एमालेको कार्यकर्ता हो कि प्रतिनिधिसभाको सभामुख ? भन्दै प्रश्न समेत गरे । उनले माओवादी विद्रोह ‘जनयुद्ध’ भएको जिकिर गरे । त्यसलाई अन्यथा व्याख्या गरिए राष्ट्रियसभा बैठक पनि अवरुद्ध पार्नुपर्ने अवस्था आउने चेतावनी दिए ।

सांसद विश्वकर्माले माओवादी ‘जनयुद्ध’लाई संविधानमा हिंसा नभनिएको पनि पटक–पटक दोहोर्‍याए । त्यसको अपव्याख्या गर्ने विषय आफूहरूलाई सैह्य नहुने उनले चेतावनी दिए । न्युज एजेन्सी नेपाल