काठमाडौं । नेकपा (माओवादी केन्द्र)का सचिव देवेन्द्र पौडेलले अहिलेको सरकार बिचौलियाको संरक्षणका लागि काम गरिरहेको आरोप लगाएका छन् ।

सोमबार संसद् भवन नयाँ बानेश्वरमा सञ्चारकर्मीसँग कुरा गर्दै पौडेलले वर्तमान सरकार भ्रष्टाचार, अनियमिततासम्बन्धी कामलाई जोगाउनका लागि बनेको फरक प्रकारको सरकार भएको र यसले बिचौलियाको संरक्षणका लागि काम गरिरहेको आरोप लगाए ।

जनतालाई झुक्काउनका लागि गरिएको संविधान संशोधनका कुराको संसद्बाट प्रतिवाद गर्ने उनले बताए । पौडेलले विद्युत् बक्यौताका विषयमा सत्तापक्षले प्रतिपक्षीलाई दोष लगाउन खोजेको भन्दै बक्यौता नउठाउनका लागि मुख्य विषयलाई विषयान्तर गर्ने प्रयास भइरहेको जिकिर गरे ।

त्यस्तै, उनले नदी किनारबाट थप २० मिटर मापदण्डको अदालतको फैसलालाई मानहानि गर्न नमिल्ने भन्दै जनतालाई उचित व्यवस्थापन गरेर मात्रै फैसला कार्यान्वयन गर्न आवश्यक रहेको बताए । यसमा अदालतसँग सरकारले दोहरी खेल्न नहुने उनको भनाइ छ ।