काठमाडौं । आयुर्वेद उपचारमा आकर्षण घटिरहेको निष्कर्षसहित स्वास्थ्य तथा जनसंख्यामन्त्री प्रदीप पौडेलले सेवा प्रभावकारी बनाउन एक हप्ताभित्र प्रस्ट योजना ल्याउन कर्मचारीहरूलाई निर्देशन दिएका छन् ।

शुक्रबार मन्त्रालयमा आयोजित आयुर्वेद सम्बद्ध अधिकारीहरूसँगको बैठकमा मन्त्री पौडेलले तत्काल स्रोत थप्न सकिने अवस्था नरहेको भन्दै अहिलेकै अवस्थामा सुधार गर्न सकिने योजना ल्याउन भनेका छन् ।

"सेवा सुधारका लागि आवश्यक नीतिगत व्यवस्था गर्न हामी तयार छौँ," उनले भने, "एक हप्ताभित्र प्रस्ट योजना लिएर आउनुहोला । द्रुत गतिमा सुधार ल्याउने गरी काम गरौँ । म साथ दिन तयार छु ।"

उनले स्रोतको मितव्ययी सदुपयोग गर्न पनि आग्रह गरे । मन्त्री पौडेलले आयुर्वेद उपचारले सान्दर्भिकता गुमाएको जस्तो देखिएको बताउँदै सुधार गर्न नसकिए पद ओगटेर बस्न नहुने बताए । "सकेसम्म सुधार गरौँ । तर, डुबाउने गरी (पदमा) नबसौँ," उनले भने ।

उनले आयुर्वेद क्षेत्रमा भारतले गरेको प्रगतिबाट पनि सिकेर सुधार गर्नुपर्ने बताए ।