काठमाडौं । उपत्यका ट्राफिक प्रहरी कार्यालयले उपत्यकाका तीन वटै जिल्लामा प्रविधिमैत्री ट्राफिक व्यवस्थापन गर्ने गरी काम थालेको छ । उपत्यकाका विभिन्न सडकमा ट्राफिक व्यवस्थापका लागि ६५ स्थानमा ट्राफिक लाइटको व्यवस्था गरिएको छ ।

तर, त्यसमध्ये २६ वटा लाइटले मात्रै काम गरेको र अन्य प्रयोगविहीन भएको पाइएपछि बाँकी लाइटलाई समेत मर्मत गरेर ट्राफिक व्यवस्थापन गरिने कार्यालयका प्रमुख प्रहरी नायव महानिरीक्षक (डीआर्ईजी) भरतबहादुर बोहराले जानकारी दिए ।

त्योबाहेक बोहराले सडक दुर्घटना र धनजनको क्षति नहुने गरी सवारी चालकहरूलाई जनचेतनामूलक कार्यक्रम समेत गरेर लैजाने बताए । 

बुधबार कार्यालयको जिम्मेवारी सम्हालेका बोहराले चक्रपथ र भक्तपुर सडकखण्डमा हुने सडक दुर्घटना रोकथामका लागि राडार गनको प्रयोगलाई पनि तीव्रता दिने बताएका छन् ।

उनले भने, “हामी कसरी सवारी दुर्घटनाबाट रोक्ने र ट्राफिक व्यवस्थापनलाई सहज बनाउने भन्ने गृहकार्यमा आजदेखि नै लागेका छौँ । पछिल्लो समय ट्राफिक प्रहरीले कुनै जानकारीविना चक्रपथ र भक्तपुर सडकखण्डमा राडार गर्न प्रयोग गरेको भन्दै विरोध भएको पाउँछौ । अब त्यस्तो हुँदैन हामी मुख्य बाटोमै त्यसबारे सूचना बोर्ड नै राखेर जाँच गर्छौँ ।”

जनचेतनामूलक कार्यक्रम गर्दासमेत ट्राफिक नियम उल्लंघन गर्ने सवारी चालकलाई भने कारबाहीको दायरामा ल्याउने बोहराको भनाइ छ । गएको असार २१ मा उमेरहदका कारण डीआईजीबाट अवकाश पाएपछि ट्राफिक प्रहरी कार्यालय निमिक्त प्रमुख एसएसपी जीवन श्रेष्ठको भरमा चलेको थियो ।

उनले समेत ३० वर्षे सेवाहदका कारण भदौ १६ मा अवकाश पाएपछि ट्राफिक प्रहरी नेतृत्वविहीन थियो । बुधबारदेखि भने डीआईजी बोहराले कमाण्ड सम्हालेका छन् ।