काठमाडौं । सांसद डा. अमरेश सिंहले शिख धर्ममाथि आक्रमण भएको भन्दै आपत्ति जनाएका छन् । गुठी संस्थानका प्रशासक, केही पूर्वप्रशासक र नेताको आडमा शिख धर्मावलम्बीको जमिन हड्प्ने र अर्कै महन्थ खडा गरी अर्कै धर्मका व्यक्तिले कब्जा गर्ने काम भएको भन्दै उनले आपत्ति जनाएका हुन् । 

धर्मनिरपेक्ष राष्ट्रमा एउटा धर्म मान्नेले कुनै अर्को धर्ममाथि अक्रमण गर्न नमिल्ने भन्दै प्रशासक र पूर्वप्रशासकलाई कारबाही गरी पेन्सन रोक्नुपर्ने उनको माग छ ।
 
नेपालमा १५औं शताव्दीमा गुरु नानक आएको र धेरै समय नेपालमै बसेको भन्दै त्यसयता नानकका अनुयायी नेपालमा रहेको उनको भनाइ छ । डा. सिंहले बूढानीलकण्ठमा शिखहरुको जग्गा कब्जा गर्नेमाथि तत्काल छानबिन थाल्न पनि माग गरेका छन् । 

गरिबहरूलाई खाना दिने गरेका नेपालका शिखको नेपालमा १५/१६ सय परिवार मात्र रहेको भन्दै अल्पसंख्यक शिखहरुमाथिको आक्रमण स्वीकार्य नहुने उनले बताए । शिखहरुले निःशूल्क उपचारका लागि अस्पताल खोल्ने प्रस्तावमा पनि सहयोग नपाइरहेको भन्दै उनले सरकारको ध्यानाकर्षण गराएका छन् ।

मुस्लिम राष्ट्र पाकिस्तानले गुरु नानकका लागि स्थान दिएर हजारौँ पर्यटक भित्र्याइरहेको भन्दै उनले नेपालमा शिख धर्मका पर्यटक बृद्धिका लागि सरकारले उनीहरुको संरक्षण गर्न जरुरी रहेको बताए ।