काठमाडौं । एभरेस्ट महिला भलिबल लिग (ईडब्लूभीएल)का लागि मधेस युनाइटेडले आफ्नो दोस्रो विदेशी खेलाडीको नाम सार्वजनिक गरेको छ । मधेसले लिगलाई मध्यनजर गर्दै ट्युनिसियाकी योस्रा जेरामदिनीलाई दोस्रो विदेशी खेलाडीको रूपमा घोषणा गरेको हो ।

योसँगै ईडब्लूभीएलका लागि दुई विदेशी घोषणा गर्ने मधेस पहिलो टोली बनेको छ । मधेसले यसअघि नै काजकिस्तानकी कालिनोभा यभजेनियालाई अनुबन्ध गरिसकेको छ ।

ट्युनिसियाको वर्तमान राष्ट्रिय टिमकी सदस्यसमेत रहेकी २३ वर्षीय योस्रासँग रसियन लिग खेलेको अनुभव छ । उनले ट्युनिसियन लिग, ट्युनिसियन सुपर कप समेत खेलेकी छन् । उनको उचाइँ १८४ सेन्टिमिटर छ ।

योस्राले मधेस युनाइटेडसँग अनुबन्ध भएकोमा खुसी व्यक्त गर्दै प्रतियोगितामा मधेसको प्रतिनिधित्व गर्न उत्साहित रहेको बताइन् ।

“पहिलो संस्करणको एभरेस्ट वुमन्स भलिबल लिगमा म मधेस युनाइटेडबाट खेल्दै छु । लिगमा लागि म उत्साहित छु । नेपालको नाम धेरै सुनेको छु । म यो सुन्दर देशमा गएर खेल्न उत्साहित छु ।”

मधेस युनाइटेडकी अपरेसन हेड संज्ञा श्रेष्ठले योस्रालाई मधेस टिममा स्वागत गर्दै उनको आगमनले टिम अझ बलियो हुने बताइन् ।

नेपाली राष्ट्रिय टिमकी स्पाइकर निरुता ठगुन्ना मार्की प्लेअरमा रहेको मधेस युनाइटेडको टिममा अहिलेसम्म आठ नेपाली र दुई विदेशी गरी १० खेलाडीको नाम सार्वजनिक भइसकेको छ ।

मार्कीसहित नेपाली खेलाडीहरूको नाम पनि यसअघि नै सार्वजनिक भइसकेको छ । जसमा राष्ट्रिय टिमकै संगम महतो र शान्तिकला तामाङ पनि छन् । यस्तै, काभा यू–२० महिला च्याम्पियनसिप खेलेकी यू–२० राष्ट्रिय टिमकी एलिशा मानन्धर र आशिका क्षेत्री पनि मधेस टिममा छन् । राष्ट्रिय टिमबाट खेलिसकेका पूजा थारू र हिरा केसी पनि मधेस टिमबाट खेल्ने छन् । यसैगरी, जसना महतो पनि मधेसको टिममा छिन् ।

ईन्फिनिटी ड्रिम्सको आयोजनामा पहिलोपटक हुन लागेको महिला भलिबलको फ्रेन्चाइज लिगको पहिलो संस्करणमा ६ टोलीले सहभागिता जनाउनेछन् ।