विराटनगर । कोसी प्रदेश सभामा तीन विधेयक दर्ता भएका छन् । प्रदेश निजामती सेवा ऐन, २०७९ लाई संशोधन गर्न बनेको विधेयक, केही प्रदेश ऐनको साविकको व्यवस्था जगाउने सम्बन्धमा व्यवस्था गर्न बनेको विधेयक र प्रदेश कृषि व्यवसाय प्रवर्धन अनुदान ऐन, २०७७ लाई संशोधन गर्न बनेको विधेयक दर्ता गरिएको कोसी प्रदेश सभा सचिवालयले जनाएको छ ।

मुख्यमन्त्री हिक्मत कार्कीले पनि प्रदेश सभा बैठक नियमित सञ्चालन गर्न सरकारले प्रशस्तै बिजनेस दिने दाबी गरे । “दसैँ अगाडिसम्म कम्तीमा सातवटा विधेयक सभामा लैजाने हाम्रो तयारी छ,” उनले भने ।

गत असार ८ गते अर्को सूचना नभएसम्मका लागि प्रदेश सभा बैठक स्थगित गरिएको थियो । प्रदेश सभा बैठक यही भदौ १४ गते शुक्रबार दिउँसो १ बजेका लागि बोलाइएको छ ।

सरकारमा कांग्रेस सामेल हुन ढिलाइ भएका कारण सभाको बैठक नियमित हुन नसकेको भन्दै टिप्पणी हुन थालेपछि बैठक बोलाइएको हो । प्रदेश सभा सचिवालयका सूचना अधिकारी निरज ढकालले सभालाई तत्काल चाहिने बिजनेस तीनवटा विधेयकबाट परिपूरण भएको बताए । 

समितिको बैठक नियमित
सभाको गतिविधि ठप्प भए पनि यस अवधिमा संसदीय समितिका बैठकहरू नियमितजस्तै सञ्चालन भएको सचिवालयले जनाएको छ । 

साउन ३१ गते सार्वजनिक लेखा समिति, मंगलबार प्राकृतिक स्रोत तथा पूर्वाधार विकास समिति र बुधबार सुशासन समितिको बैठक बसेको छ । यसैगरी, पर्सि (शुक्रबार) सामाजिक विकास समितिको बैठक डाकिएको सचिवालयले जनाएको छ ।