पोखरा । आर्थिक अवस्था कमजोर भएकी बालिकालाई प्रलोभन देखाएर चिनियाँ नागरिकसँग विवाह गरिदिएको आरोपमा कास्की प्रहरीले दुई महिलासहित तीन जनालाई पक्राउ गरेको छ ।

पक्राउ परेका दुई महिलाले बालिका मिलाइदिएबापत चिनियाँ नागरिकसँग रकम लिएको खुलेको छ । लमजुङ घर भई पोखरा–१६ बस्ने २२ वर्षीय सरु बिक र पोखरा–२२ आर्वाकी ३४ वर्षीय भगवती अधिकारीलाई प्रहरीले पक्राउ गरेको हो ।

उनीहरूसँगै चीनको हुनान प्रान्तका ३१ वर्षीय झी मिङ चेन पनि पक्राउ परेका छन् । उनी पोखरा–६ स्थित एक गेस्ट हाउसमा बस्दै आएका थिए ।

पक्राउ परेका दुई महिलाले एक १४ वर्षीय बालिकालाई फकाएर ती चिनियाँ नागरिकसँग विवाह गरिदिएका थिए ।

“तिमी दुःख पाउने केटी रहेछौ, हामीहरूले चिनियाँ नागरिकलाई चिनेका छौँ, तिमी ऊसँग विवाह गर्‍यौ भने तिम्रो भविष्य बन्छ,” उनीहरूले प्रलोभन दिएका थिए ।

उनीहरूले आफैँले प्रहरीसँगको बयानमा बालिकालाई फकाएको बताएका छन् ।

प्रहरीका अनुसार प्रलोभनमा परेकी बालिकालाई उनीहरूले साउन १३ गते चिनियाा नागरिकसँग विवाह गराइदिएका थिए । विवाहपछि ती चिनियाँ नागरिकले बालिकालाई अर्को होटलमा नै बन्धक बनाएर राखेका थिए । बालिका त्यहाँबाट भागेपछि मात्र घटना सार्वजनिक भएको हो ।

जिल्ला प्रहरी कार्यालय कास्कीका सूचना अधिकारी प्रहरी नायब उपरीक्षक वसन्तकुमार शर्माले पीडित बालिकाका अभिभावकसँगको समन्वयमा उद्धार गरिएको बताए ।

बालिकाको उद्धारपछि उनका अभिभावकले मानव बेचबिखन तथा ओसारपसार कसुरमा जाहेरी दिएका थिए । उनीहरूको जाहेरीपछि प्रहरीले मंगलबार उनीहरूलाई पक्राउ गरेको हो ।

उनीहरूमाथि जिल्ला अदालत कास्कीबाट मानव वेचबिखन तथा ओसारपसार मुद्दामा पाँच दिन म्याथ थपेर अनुसन्धान अगाडि बढाइएको प्रहरीले जनाएको छ ।