चितवन । पूर्वपश्चिम राजमार्गअन्तर्गत चितवनको राप्ती नगरपालिका–५, पम्फा पुलमा बस र ट्रक ठोक्किँदा १० यात्रु घाइते भएका छन् ।

काठमाडौंबाट धरानतर्फ जाँदै गरेको बाप्र०१–००६ख ४७९९ नम्बरको बस र सोही दिशातर्फ जाँदै गरेको ना६ख ५९२७ नम्बरको ट्रक एकापसमा सोमबार बिहान ठोक्किँदा बसमा सवार १० जना घाइते भएका हुन् ।

घाइतेमध्ये सातजनाको अवस्था मध्यम छ । तीनजनाको अवस्था सामान्य रहेको जिल्ला प्रहरी कार्यालय चितवनका प्रवक्ता भेषराज रिजालले जानकारी दिए ।

घाइतेमध्ये भरतपुरस्थित कलेज अफ मेडिकल साइन्सेस शिक्षण अस्पतालमा चार र एलाइभ हस्पिटल एन्ड ट्रमा सेन्टरमा ६ जनाको उपचार भइरहेको छ ।

प्रहरीले दुवै सवारीसाधनसहित बसका चालक सप्तरीको तिरुत गाउँपालिका–२ का ४० वर्षीय सन्तोषकुमार यादव र ट्रकचालक रामेछापको साङटार गाउँपालिका–२ का ३५ वर्षीय निरकुमार प्रधानलाई नियन्त्रणमा लिएको छ । रासस