काठमाडौं । जनमत पार्टीले मधेस प्रदेशका मुख्यमन्त्री सतिशकुमार सिंहलाई स्पष्टीकरण सोधेको छ । जम्बो मन्त्रिपरिषद् बनाएको विषयमा उनलाई स्पष्टीकरण सोधिएको प्रवक्ता शरदसिंह यादवले जानकारी दिए । 

सिंहलाई मन्त्रालय बाँडफाँट गर्दा पार्टीसँग समन्वय नगरेको र अहिले राज्यमन्त्री थपेको पनि जानकारी नगराएको स्पष्टीकरणमा उल्लेख छ । परिणाम देखिनेगरी जनताको हकहितका लागि मन्त्रालयको काममा ध्यान दिनभन्दा अनावश्यक उद्घाटन समारोहहरूमा समय खर्चिँदै आएको आरोप उनीमाथि लगाइएको छ ।

पार्टीले दिएका निर्देशन नमानेको उनले बताए । बजेट बनाउने क्रममा सांसदलाई पाँच करोड दिने विवादास्पद अभिव्यक्ति दिई पार्टीको छविमा बारम्बार आँच पुर्याउने विषय स्पष्टीकरणपत्रमा उल्लेख गरिएको छ । मधेस सरकार २० सदस्यीय बनाइएपछि आलोचना भइरहेको छ ।