काठमाडौं । नेपाली महिला भलिबल टिमकी कप्तान अरुणा शाहीले भारतविरुद्धको ऐतिहासिक जितमा नै आफूहरू सीमित नरहने बताएकी छन् ।

भारतविरुद्ध पहिलोपटक जित निकाल्नु खुसीको क्षण रहे पनि लक्ष्य अझै बाँकी रहेको उनले उल्लेख गरिन् । उनले लिगमा शीर्ष स्थानमा रहँदै सेमिफाइनलमा पुग्ने लक्ष्य सुनाइन् । नेपालले शनिबार भारतमाथि ३–२ को जित निकाल्दै छिमेक प्रतिद्वन्द्वीविरुद्ध पहिलोपटक सफलता पाएको हो ।

• भारतविरुद्ध नेपाली महिला भलिबल टिमको ऐतिहासिक जित

कप्तान अरुणाले समूह चरणका खेल अझै बाँकी र अबको लक्ष्य इरानजस्तो बलियो टिमलाई हराउनु पनि भएको उल्लेख गरिन् । उनले जितबाट धेरै उत्साहित नभई सेमिफाइनल र फाइनलतर्फको खेलमा ध्यान दिने बताइन् ।

यद्यपि, जितबाट तत्काल धेरै खुसी भएको उनले प्रतिक्रिया दिइन् । राम्रो सुरुआतका बाबजुद लय बिग्रिए पनि ‘रिकर्भर’ गर्न सफल भएको अरुणाको भनाइ थियो ।

टिमका मुख्य प्रशिक्षक जगदीश भट्टले सन् २०१६ पछि नेपाली महिला भलिबलको स्तर क्रमशः वृद्धि भइरहेको बताए । भारतविरुद्ध पछिल्लोपटक कडा प्रतिस्पर्धा हुँदै आए पनि यसअघि जित्न नसकेको उनले उल्लेख गरे । शनिबार जित निकाल्दै इतिहास रचेको उनले बताए ।

बलियो टिम इरानविरुद्ध खेल्न बाँकी नै रहेको उनले पनि सुनाए । उपाधिका निम्ति धेरै मिहिनेत गर्न बाँकी रहेको उनले बताए । उनले पनि यो जितबाट धेरैथोक पाइसकेको महसुस आफ्नो टिमले नगर्ने स्पष्ट पारे । 

भारतीय टिमका प्रशिक्षक जाई नारिनले सुरुआतमा सेट गुमाए पनि आफूहरूले ‘फाइट ब्याक’ गरेको बताए । निर्णायक सेटमा केही गल्ती हुँदा खेल गुमाउनुपरेको उनले उल्लेख गरे । फाइनलमा पुनः चुनौती दिइने उनको विश्वास छ ।

भारतीय टिमकी कप्तान अनुश्रीले नेपाललाई फाइनलमा हराउने अर्को अवसर पनि रहेको बताइन् । नेपाली दर्शकबीच खेल्दा धेरै दबाब पनि नरहेको उनको भनाइ थियो । न्युज एजेन्सी नेपाल