काठमाडौं । खाडी राष्ट्र युनाइटेड अरब इमिरेट्स (यूएई)मा पछिल्लो एक वर्षको अवधिमा २३१ नेपालीको मृत्यु भएको छ । उनीहरू सबै वैदेशिक रोजगारीका सिलसिलामा यूएई गएकाहरू हुन् ।

गत आर्थिक वर्ष २०८०/८१ मा विविध कारणले उनीहरूको मृत्यु भएको यूएईस्थित नेपाली दूतावासले जानकारी गराएको छ ।

मृत्यु भएका नेपालीका परिवारलाई क्षतिपूर्ति तथा बिमाबापत प्राप्त लगभग १२ करोड ५५ लाख रुपैयाँ (३४ लाख ४६ हजार ५०० यूएई दिराम) दूतावासले पठाएको छ ।

गएको असारमा मात्र यूएईमा ३२ नेपालीको मृत्यु भएको दूतावासले जनाएको छ ।

अघिल्लो आर्थिक वर्ष २०७९/८० मा वैदेशिक रोजगारीका क्रममा यूएईमा १६७ नेपालीले ज्यान गुमाएका थिए ।

विभिन्न देशमा वैदेशिक रोजगारीमा गएका मध्ये २०८०/८१ मा एक हजार ३५५ नेपालीको मृत्यु भएको थियो । वैदेशिक रोजगारीका क्रममा मृत्युमध्ये १७ प्रतिशतभन्दा बढी यूएईमा भएको तथ्यांक छ ।