काठमाडौं । लगातार उच्च अंकले बढेको धितोपत्र दोस्रो बजारमा सोमबार करेक्सन देखिएको छ । दिनभरिको उतारचढावका बीच बजार अन्तिम एक मिनेटमा दुई अंकले बढेर बन्द भयो ।

यस दिन नेप्से परिसूचक २.१५ अंकले बढेर २४८८.०९ विन्दुमा बन्द भएको हो । बढेको बजारमा नाफा बुक गर्नेहरू सक्रिय हुँदा बजारमा दिनभरि नै उतारचढाव देखियो ।

कारोबार रकममा भने कमी देखिएको छ । सोमबार १३ अर्ब ९१ करोड ५५ लाख रुपैयाँको सेयर कारोबार भएको नेपाल स्टक एक्सचेन्ज (नेप्से)ले जनाएको छ । आइतबारको तुलनामा कारोबार रकम एक अर्ब ३२ करोड रुपैयाँले कम भएको हो ।

११५ कम्पनीको सेयर मूल्य वृद्धि भएको छ । १२१ कम्पनीको सेयर मूल्य घटेको छ । बाँकी ६ कम्पनीको सेयर मूल्य स्थिर छ ।

मुक्तिनाथ कृषि कम्पनी लिमिटेडको सेयर मूल्य १० प्रतिशतले वृद्धि भएर प्रतिकित्ता एक हजार ४९४ रुपैयाँ कायम भएको छ । नेपाल फाइनान्सको सेयर मूल्य ८.६७ प्रतिशतले बढेर एक हजार १७९ रुपैयाँ कायम भएको छ ।

कारोबारमा आएका १३ मध्ये ६ समूहको परिसूचक घटेको छ । बाँकी समूहको परिसूचक बढेको छ । सर्वाधिक परिसूचक वृद्धि उत्पादन तथा प्रशोधन समूहको भएको छ । यो समूहको परिसूचक २.१६ प्रतिशतले बढेको नेप्सेले जनाएको छ ।

सर्वाधिक परिसूचक घट्नेमा वाणिज्य बैंक समूह छ । यो समूहको परिसूचक १.२३ प्रतिशतले घटेको छ ।