ढाका । बंगलादेशमा आरक्षण विरोधी आन्दोलनका क्रममा गएको सातामात्रै ११४ जनाको मृत्यु भएपछि सरकारले त्यहाँ कर्फ्यु जारी गरेको छ । सरकारले आज आइतबार र भोलि सोमबार त्यहाँ सरकारी कार्यालय र प्रतिष्ठानहरू पनि बन्द गर्न आग्रह गर्दै सार्वजनिक बिदा दिएको छ ।

त्यहाँ रहेका करिब ८०० नेपाली विद्यार्थीले शनिबारसम्ममा हवाई र स्थलमार्गबाट बंगलादेश छोडेको परराष्ट्र मन्त्रालयले शनिबार राति एक्समार्फत जानकारी गराएको थियो ।

यसैबीच स्थानीय पत्रिकाले जनाएअनुसार करिब १०० विदेशी विद्यार्थी बंगलादेशबाट उत्तरपूर्वी भारतको त्रिपूरास्थित एकीकृत चेकपोस्ट हुँदै भारततर्फ छिरेका छन् । ती करिब १०० जनामा नेपाली पनि रहेको र सबैसँग आधिकारिक कागजपत्र रहेको भारतीय अधिकारीहरूले जनाएका छन् ।

यसैगरी भारतको मेघालयसँग जोडिएको बंगलादेशको सीमाबाट पनि सयौँको संख्यामा नेपाली तथा अन्य विद्यार्थी छिरेको स्थानीय भारतीय अधिकारीहरूले बताएका छन् ।

बंगलादेशको रंगपुर मेडिकल कलेजमा अध्ययन गरिरहेका नेपाली विद्यार्थी राहुल राईले भारतको हैदरावादबाट प्रकाशित हुने सियासत डेलीसँगको कुराकानीमा भनेका छन्, "बंगलादेशको अवस्था खराब भएको छ । जताततै सुरक्षाकर्मीसँग भिडन्त भइरहेको छ । हामीले असुरक्षित महसुस गरेर फर्कने निर्णय गरेका हौँ ।"