काठमाडौं । नेपाल मलखम्ब खेलकुद संघले अन्तर्राष्ट्रिय मलखम्ब प्रशिक्षण कार्यक्रम सम्पन्न गरेको छ ।

मलखम्ब खेलको विस्तारका निम्ति तीन वर्षअघिबाट औपचारिक रूपमा सुरु भएको थियो । संघले आयोजना गरेको प्रशिक्षक प्रशिक्षणमा १३ प्रशिक्षक र ७५ प्रशिक्षर्थीको सहभागिता थियो । जुलाई ८ देखि १९ सम्म भएको यो अन्तर्राष्ट्रियस्तरको लेवल वान कोर्ष भएको पनि संघले जनाएको छ । कार्यक्रममा भारत लगायतका प्रशिक्षकहरूको पनि उपस्थिति थियो ।

नेपाल अन्तर्राष्ट्रिय मलखम्ब फेडेरेसनको सदस्य राष्ट्रसमेत हो । फेडेरेसनमा अमेरिका, जापान, जर्मनी, भारत, सिंगापुरसँगै नेपालसमेत गरी कुल ६ राष्ट्र छन् । फेडेरेसनले मलखम्बको विश्वकपसमेत आयोजना गर्ने गरेको छ  । २५ देशले खेल्ने मलखम्बको तेस्रो विश्वकपमा नेपालले तेस्रो स्थान हासिल गरेको थियो ।

सन् १९३६ मा वर्लिन ओलम्पिकमा मलखम्ब प्रदर्शन गरिएको थियो । यसपटक जुलाई २६ देखि हुने पेरिस–२०२४ ओलम्पिकमा पनि मलखम्ब प्रदर्शन हुँदै छ । जसमा भारतमा पद्मश्री पुरस्कार पाएका उद्धपदेश पाण्डेले टिमको नेतृत्व गर्नेछन् । यस्तै, सन् २०२८ मा अमेरिकामा हुने लसएन्जलस ओलम्पिकमा मलखम्बलाई समावेश गरी सहभागी हुने मलखम्बका अन्तर्राष्ट्रिय प्रशिक्षक रामशरण शर्माले जानकारी दिए ।