![महिला लिगको बजेट दुई करोड २४ लाख, थपिए चार टिम](https://12khari.top/uploads/posts/efasdgmdgm-1721218325.jpg)
काठमाडौं । अखिल नेपाल फुटबल संघ (एन्फा)ले महिला लिग आयोजनाका निम्ति बजेट पारित गरेको छ । एन्फाको बुधबार बसेको कार्यसमितिको भर्चुअल बैठकबाट यो वर्ष हुने भनिएको महिला लिगका लागि दुई करोड २४ लाख ६८ हजार ६९८ रुपैयाँको बजेट पारित गरिएको हो ।
कार्यसमितिका २१ मध्ये आठजनाले उक्त बैठक बहिष्कार गरेका थिए । महिला लिगमा १० टिम सहभागी गराउने निर्णय पनि बैठकबाट गरिएको छ । तीन विभागीय र तीन महिला लिग छनोटबाट आएकासहित संकटा, वाग्मती युथ क्लब, वालिङ र चन्द्रपुर नगरपालिकालाई महिला लिगमा सहभागी गराउने निर्णय गरिएको हो ।
एन्फाका प्रवक्ता सुरेश शाहले महिला फुटबललाई चलायमान र व्यावसायिक बनाउन क्लब र नगरपालिकालाई लिगमा समावेश गरिएको बताए । “महिला फुटबललाई चलायमान र व्यावसायिक बनाउन दुई क्लब र दुई नगरपालिकालाई पनि लिगमा समावेश गर्ने निर्णय भएको हो । लिगका लागि वालिङ र चन्द्रपुरले तयारी पनि गरिरहेका छन्,” शाहले बाह्रखरीसँग भने ।
आउँदो भदौ १६ गतेदेखि महिला लिग सुरु हुने एन्फाले जनाएको छ । एन्फाका अनुसार लिगको सुरुआतमा १० टिमले सिंगल राउन्ड रोबिन पद्धतिमा ४५ खेल खेल्नेछन् । यसबाट शीर्ष पाँच टिमले डबल राउन्ड रोबिनमा २० खेल खेल्नेछन् ।
त्यसपछि शीर्ष चार टिमले क्वालिफायर्स र इलिमिनेटरबाट फाइनल खेल्ने एन्फाले जनाएको छ । महिला लिगभर कुल ६९ खेल हुनेछ ।