पेरिस । फ्रान्सेली राजनीतिको शिखरमा जोर्डन बर्डेलाको उदय यति छिटो भएको छ कि उनलाई अझै पनि ‘कल अफ डिउटी’ खेलेर बिताएका किशोरावस्थाको बारेमा प्रश्न सोध्ने गरिएको छ ।

यिनै व्यक्ति यो हप्ता केवल २८ वर्षको उमेरमा फ्रान्सको प्रधानमन्त्री बन्न सक्ने अवस्था छ । यसो भएमा उनी गएको २०० वर्षमा युरोपका सबैभन्दा कान्छो प्रधानमन्त्री बन्नेछन् ।

उनी पुरानो पार्टीका नयाँ अनुहार हुन्, जो आफूलाई नयाँ बनाउन लागिपरेका छन् । नेसनल र्‍याली (आरएन) घोर दक्षिणपन्थी पार्टीमा डोयेन्न मरिन ली पेनले बर्डेलालाई नयाँ नेतृत्वका रूपमा चयन गरेकी हुन् । पहिलो चरणको निर्वाचनमा यो पार्टीले राष्ट्रपति इमानुएल म्याक्रोनको मध्यमार्गी गठबन्धनलाई निकै पछाडि पारेको थियो ।

दोस्रो तथा अन्तिम चरणको निर्वाचन आइतबार (आज) भइरहेको छ । यो चुनावमा बर्डेला नेतृत्वको पार्टीले आफ्नो विजय हुने अपेक्षा गर्दै आएको छ ।

यो चुनावमा पहिलोपटक मरिन र बर्डेलाको पार्टी नेसनल र्‍यालीलाई सरकार बनाउन नेसनल एसेम्बलीमा बहुमतको मौका मिल्न सक्छ ।

गएको आइतबार पहिलो चरणको निर्वाचन भएको थियो । उक्त निर्वाचनमा नेसनल र्‍यालीले अग्रस्थान हासिल गरेको थियो । त्यसपछि अरू दलहरूले अहिलेको निर्वाचनमा थुप्रै उमेदवारी फिर्ता गरी एकार्कालाई सघाएका छन् । यसको मतलब घोर दक्षिणपन्थी पार्टीका उमेदवारलाई हराउन सकियोस् ।

पहिलो चरणको निर्वाचनपछि बोल्दै नेसनल र्‍यालीकी नेत्री मरिनले राष्ट्रपति म्याक्रोनको समूहको सफाया भएको बताएकी थिइन् ।

सोही पार्टीका नेता बर्डेलाले पनि फ्रान्सेली जनताले मत दिए आफू प्रधानमन्त्री हुने बताएका थिए । फ्रान्सको ५७७ सदस्यीय नेसनल एसेम्बलीमा बहुमत प्राप्त गर्न २८९ सिटमा जित्न जरुरी छ । राष्ट्रपति म्याक्रोनले युरोपेली संसद्को चुनावमा नेसनल र्‍यालीको विजय देखेर अचानक चुनावको घोषणा गरेका थिए ।

आजको चुनावको नतिजापछि नेसनल र्‍यालीले सरकार बनाउने कि नबनाउने तय हुनेछ । यसैमा २८ वर्षीय बर्डेला प्रधानमन्त्री बन्न पाउँछन् कि पाउँदैनन् भन्ने पनि निर्भर छ । परिणाम जस्तोसुकै आए पनि राष्ट्रपति म्याक्रोनलाई त्यति सहज हुने अवस्था छैन ।

इटालियन आप्रवासीको एक मात्र सन्तान बर्डेला पेरिसको श्रमिकवर्गको उपनगर सेइन–सेन्ट–डेनिसमा हुर्केका थिए । उनी १६ वर्षको उमेरमा आरएनमा सामेल भए । पछि प्रतिष्ठित सोर्बोन विश्वविद्यालयमा भूगोलको डिग्री लिन थाले । पार्टीमा लाग्नुअघि उनी त्यहीँ पढ्दै थिए ।

बर्डेला सन् २०२२ देखि नेसनल र्‍यालीका अध्यक्ष छन् । उनी २०१९ मा युरोपेली संसद्को सांसद पनि भएका थिए । उनी अध्यक्ष बन्नुअघि उक्त पार्टीका २०१९ देखि २०२१ सम्म उपाध्यक्ष थिए । त्यसअघि, २०१७ देखि २०१९ सम्म पार्टी प्रवक्ता थिए । उनी २०१८ देखि २०२१ सम्म युथ विङको अध्यक्ष पनि थिए ।

पार्टीकी नेत्री मरिनले राष्ट्रपतिको चुनावमा म्याक्रोनसँग हारेपछि आफ्नो उत्तराधिकारीका रूपमा बर्डेलालाई छानेकी हुन् ।

मरिन पार्टीको दैनिक व्यवस्थापनबाट मुक्त, तर २०२७ मा राष्ट्रपतिका निम्ति पुनः उमेदवारी दिने लगभग निश्चित छ । उनले पार्टीको छवि ताजा र उजिल्याउने सफलता पाएकी छन् । आफ्ना बाबु जीन मेरीले उक्त पार्टीलाई एउटा जातिवादीका रूपमा अघि सारेकामा पछि छोरीले त्यसलाई केही सच्याएकी थिइन् ।

पुराना मतदातालाई यसले दोस्रो विश्वयुद्धताकाको भिची शासनको झल्को दिन्छ । तर, नयाँ मतदाता यो पार्टीमा आकर्षित भइरहेका छन् ।

बर्डेलाको टिकटक फलोअर निकै छन् । उनले बोनबोन (चकलेट) खाँदै गरेको भिडियो समेत ७.५ मिलियन पटकसम्म हेरिएको छ । केवल दुई वर्षमा बर्डेलाले उक्त पार्टीलाई स्वीकार्य र चयनयोग्य बनाउन सफलता पाएका छन् ।

राष्ट्रपति म्याक्रोनको गठबन्धनको प्रचार सामग्री भने त्यति गतिलो छैन । २८ वर्षीय बर्डेला फ्रान्सको प्रधानमन्त्री बन्छन् कि बन्दैनन् भन्ने आजको निर्वाचनले तय गर्नेछ । एजेन्सी