काठमाडौं । नेकपा (एकीकृत समाजवादी)का प्रदेश अध्यक्षहरूले पार्टी अध्यक्षमा माधव नेपाल र महासचिवमा घनश्याम भुसाललाई सर्वसम्मत चयन गर्नुपर्न निष्कर्ष निकालेका छन् । लुम्बिनी प्रदेशका अध्यक्ष साेमप्रसाद पाण्डेले आफूहरूले महाधिवेशन सर्वसम्मत बनाउनुपर्ने निष्कर्ष निकालेको जानकारी लिए ।

सम्मानित नेता झलनाथ खनाललाई अधिकारसहितकाे पद दिएर महाधिवेशन सर्वसम्मत गर्नुपर्ने उनीहरूको निचोड छ ।

"पार्टीले लिएकाे लक्ष्य पूरा गर्न तीन  नेता चाहिने निष्कर्ष निकाल्याैँ । अध्यक्षमा माधव नेपाललाई नै एक कार्यकाल दिनुपर्छ । महासचिव घनश्याम भुसाल र सम्मानित नेतालाई अधिकारसहितकाे पद दिएर महाधिवेशन सर्वसम्मत गर्नुपर्छ," उनले भने ।

छलफलमा कोसीका बलदेव चौधरी, मधेस प्रदेशका रामचन्द्र यादव, वाग्मतीकी सावित्री भुसाल, गण्डकीका श्रीराम बराल, लुम्बिनीका पाण्डे, कर्णालीका अम्बर थापा र सुदूरपश्चिमका हर्कबहादुर सिंह सहभागी थिए । त्यस्तै, उपत्यका विशेषका केदार सञ्जेल पनि सहभागी थिए ।

पाण्डेले नेपाल र खनालसँग छलफल गरेकाे र अब भुसालसँग छलफल गर्न बाकी रहेकाे बताए ।

सहमति नहुने अवस्था आए महाधिवेशनकाे हलमा आफूहरूले हस्तक्षेप गर्ने उनको भनाइ छ ।

खनालकाे सचिवालयले भने खनाललाई अध्यक्ष बनाउने गरी छलफल भएकाे दाबी गरेकाे छ ।