![अर्थको प्रशासन प्रमुखमा १५ दिन टिकेनन् सापकोटा, बजेट महाशाखा पुगे राणा](https://12khari.top/uploads/posts/Artha-1719315974.jpg)
काठमाडौं । अर्थ मन्त्रालयका पाँच सहसचिवको कार्यभार हेरफेर गरिएको छ । अर्थ मन्त्रालयको जगेडामा रहेका रामप्रसाद आचार्यलाई प्रशासन प्रमुखको जिम्मेवारी दिइएको छ ।
यसअघि प्रशासन प्रमुख रहेका नारायण सापकोटालाई महालेखा नियन्त्रक कार्यालयमा पठाइएको छ । उनी अर्थ मन्त्रालयको प्रशासन प्रमुखमा १५ दिन पनि टिकेनन् । अर्थमन्त्री वर्षमान पुनले टोकराज पाण्डेलाई हटाएर जेठ २८ गते सापकोटालाई प्रशासन प्रमुखको जिम्मेवारी दिएका थिए । पाण्डे अहिले पनि मन्त्रालयको जगेडामै छन् ।
नेपाल धितोपत्र बोर्डको अध्यक्षको जिम्मेवारीमा रहेका नरेन्द्रकुमार राणालाई बजेट महाशाखा प्रमुखको जिम्मेवारी दिइएको छ । यसअघि बजेट महाशाखा प्रमुख रहेका रितेश शाक्यविरुद्ध अख्तियार दुरुपयोग अनुसन्धान आयोगले अन्तःशुल्क स्टिकरमा भएको अनियमितताको विषयमा विशेष अदालतमा भ्रष्टाचार मुद्दा दायर गरेपछि उनी निलम्बनमा परेका छन् ।
शाक्य निलम्बनमा परेपछि अर्थमन्त्री पुनले आफ्ना विश्वासपात्र राणालाई बजेट महाशाखा प्रमुखको जिम्मेवारी दिएका हुन् । राणा अहिले नेपाल धितोपत्र बोर्डको अर्थ मन्त्रालयको प्रतिनिधि हुन् ।
कार्यकारी अध्यक्ष नियुक्त नभएसम्म अर्थ मन्त्रालयको प्रतिनिधि नै अध्यक्ष हुने व्यवस्था ऐनमा छ । सोही व्यवस्थाबमोजिम अहिले राणा बोर्डको अध्यक्ष हुन् ।
अर्थ मन्त्रालय स्रोतका अनुसार सहसचिव सुशिला अर्याललाई महालेखा नियन्त्रकको कार्यालय र रामकुमार महतोलाई भन्सार विभागको उपमहानिर्देशकका रूपमा पठाइएको छ । भन्सार विभागका उपमहानिर्देशक टंकप्रसाद पाण्डे पनि अन्तःशुल्क स्टिकर प्रकरणमा मुछिएपछि निलम्बनमा परेका छन् ।