काठमाडौं । भक्तपुरको सूर्यविनायक नगरपालिका–४, दधिकोटका डिल्लीबहादुर राउतको घरबाट दुई करोड रुपैयाँ लुटपाट गर्ने समूहलाई प्रहरीले पक्राउ गरेको छ ।

प्रहरीको उपत्यका अपराध अनुसन्धान कार्यालय मीनभवनको टोलीले ३५ वर्षीय राउतको घरबाट लुटपाट गर्ने चारजनालाई पक्राउ गरेको हो । उनीहरूले गत असार ४ मा लुटपाट गरेका थिए । 

पक्राउ पर्नेहरूमा सिन्धुपाल्चोकको बाह्रविसे नगरपालिका–२ का ३० वर्षीय सुजन रसाइली, सोही ठाउँकै ३१ वर्षीय भीमबहादुर तामाङ, ३८ वर्षीय कृष्णबहादुर बोहरा, ओखलढुंगाको मानेभञ्ज्याङका मुनाराज राई छन् ।

• भक्तपुरबाट ‘फिल्मी शैली’ मा लुटियो दुई करोड ! लुटेराले घरधनीसँग कागज गराएर गरे खानतलास

पक्राउ परेका चारजनालाई कार्यालयको टोलीले मंगलबार सार्वजनिक गरेको हो । उनीहरूमध्ये रसाइली र तामाङलाई भक्तपुरबाट, राईलाई ओखलढुंगाबाट र बोहरालाई महाराजगञ्जबाट विभिन्न मितिमा पक्राउ गरिएको कार्यालयका प्रमुख एसएसपी सानुराम भट्टराईले जानकारी दिए ।

उनीहरूले आफूहरू प्रहरीको केन्द्रीय अनुसन्धान ब्युरो (सीआईबी)को ‘प्रहरी हुँ’ भन्दै लुटपाट गरेका थिए । पक्राउ परेकाहरूमध्ये बोहरा प्रहरी हवल्दार हुन् ।

यसरी बुनेका थिए लुटपाटको योजना

घटनाको अनुसन्धान गर्न उपत्यका प्रहरी कार्यालयले प्रहरी नायव उपरीक्षक (डीएसपी) अनिल घिमिरेको नेतृत्वमा टोली खटाएको थियो । दिउँसै भएको घटनालाई कार्यालयको टोलीले विशेष प्रविधि विश्लेषण गरेर अनुसन्धान गरेको थियो । सोही कारण घटनाको एक हप्तामै प्रहरीले लुटपाटमा संलग्न चारजनालाई पक्राउ गर्न सफल भएको हो ।

पक्राउ परेकामाथि अनुसन्धान गर्दै जाँदा लुटपाट घटनामा मुख्य योजनाकार डिल्लीबहादुरकै मामा कुलबहादुर खत्री रहेको खुलाएको छ । डिल्ली र कुलबहादुर दुवै वैदेशिक रोजगारीसम्बन्धी काम गर्ने गरेको खुलेको छ । 

डिल्लीबहादुरको घरमा करोडौँ रुपैयाँ रहेको सूचना कुलबहादुरले सुजनलाई सुनाएका थिए । विभिन्न आपराधिक गतिविधिमा सक्रिय सुजनलाई उक्त सूचना पुगेपछि भने लुटपाटको योजना बन्यो । 

त्यसका लागि सुजनलाई कुलबहादुरले डिल्लीको घरसमेत देखाए । सोही योजनामा सुजनले सिन्धुपाल्चोकका भीमलाई सामेल गराए । भीममार्फत मुनाराज र प्रहरी हवल्दार बोहरा सुजनसँग जोडिए । चारजनाको भेटपछि भने उनीहरूले प्रहरी नै बनेर घरभित्र जाने योजना बनाए । घरभित्र खानतलासी गरेर रकम लुटपाट गर्ने योजना उनीहरूले बनाए ।

• ‘प्रहरी हुँ’ भन्दै व्यवसायीको घरबाट दुई करोड लुुटपाट

प्रहरीका अनुसार लुटपाटअघि भक्तपुरको कौशलटारस्थित लाइभ बर्गर एन्ड पिज्जा पोइन्टमा बसेर चारैजनाले लुटपाटको योजना बनाएको खुलेको छ । त्यसपछि भने उनीहरू खुकुरीसहित दिउँसो १ बजे डिल्लीबहादुरको घरमा पुगेका थिए । आफूहरू सीआईबीकै प्रहरी भएको बताएर दुई करोड रुपैयाँ लुटपाट गरेका हुन् । कुलबहादुर भने हाल फरार छन् । 

यसरी परे प्रहरीको फन्दामा

घरबाट दुई करोड रुपैयाँ लुटपाट गरेर लुटेरा समूह भाग्दा समेत घरधनी डिल्लीबहादुरले भने प्रहरीलाई खबर गरेनन् । दिउँसो १ बजे भएको घटनाबारे प्रहरीले बेलुका ५ बजेमात्रै थाहा पायो ।

प्रहरीलाई डिल्लीबहादुर आफैँले खबर गरेनन् । साथीमार्फत सूचना पुगेको अनुसन्धानमा खटिएका प्रहरी अधिकारीको भनाइ छ । त्यतिबेलासम्म लुटेराले गोकर्णेश्वर नगरपालिका–४, माकलबारी पुगेर रकम बाँडफाँट गरिसकेका थिए । 

रकम बाँडफाँटपछि भने कुलबहादुर र लुटेरा चारजना नै छुट्टिए । यता प्रहरीलाई अनुसन्धान गर्न चुनौती थपिएको थियो ।

घटना शंकास्पद र घरधनीकै भूमिकाको बारेमासमेत प्रहरीले अनुसन्धान गरेको थियो । प्रहरीले लुटपाट भएको समय डिल्लीको घरअघिको सडकमा गुडेका कारदेखि मोटरसाइकलबारे सीसी क्यामेराको दृश्यमार्फत विश्लेषण ग¥यो । त्यही विश्लेषणका आधारमा प्रहरीले सुरुमा १५ वटा मोटरसाइकलमाथि अनुसन्धान थाल्यो ।

मोटरसाइकलको विवरण यातायात कार्यालयमार्फत झिकाएर सम्बधित धनीसँग सोधपुछ गरे । सोही क्रममा शंकास्पद रूपमा डिल्लीबहादुरको घरमा पुगेका दुई वटा सवारीमाथि अनुसन्धान गर्दै जाँदा लुटपाटमा संलग्न चारजनालाई पक्राउ गर्न सफल भएको हो ।

लुटपाटको रकम बाँडफाँटपछि पक्राउ परेका सुजन र भीम सिन्धुपाल्चोकको तातोपानी हुँदै दोलखाको कालिञ्चोक पुगेका थिए । त्यहाँबाट फर्किँदै गर्दा भक्तपुरको साँगाबाट ७ असारमा पक्राउ परेका हुन् ।

उनीहरू पक्राउपछि घटनामा मुनाराज र प्रहरी हवल्दार बोहरासमेत संलग्न रहेको खुलेको छ । सोमबार उनीहरूसमेत पक्राउ परेका हुन् ।

प्रहरीको अनुसन्धानका क्रममा भीम र प्रहरी हवल्दार बोहरा स्कुल पढ्दादेखिकै साथी हुन् । प्रहरीले पक्राउ गरेका चारजनाकै साथबाट लुटपाट गर्न प्रयोग गरिएको दुई वटा मोटरसाइकल, मोबाइल १० थान, खुकुरी र ३६ लाख रुपैयाँ नगद बरामद गरेको छ ।

लुटिएको रकममध्ये सबैभन्दा बढी डिल्लीबहादुरकै मामा कुलबहादुरले लिएको खुलेको छ । केही रकम भने पक्राउ परेकाहरूले खर्च गरेको कार्यालयका एसएसपी भट्टराईले जानकारी दिए । 

पक्राउ परेकामध्ये सुजन २०७६ सालमा नक्कली सुन देखाइ लुटपाट गरेको घटनामा जेल बसेर छुटेको समेत पाइएको छ । उनी अभद्र र चोरी डकैतीमा मुद्दामा समेत पक्राउ परेर छुटेको खुलेको छ ।