काठमाडौं । प्रमुख प्रतिपक्ष दल नेपाली कांग्रेसका सांसद अर्जुननरसिंह केसीले नुवाकोटको ऐतिहासिक महत्त्वको साततले दरबार पुनर्निर्माणमा सरकारले चासो नदिएको बताएका छन् । 

आइतबार प्रतिनिधिसभा बैठकको शून्य समयमा उनले सो बताएका हुन् । २०७२ सालको भूकम्पले थिलथिलो बनाएको सो दरबारको पुनर्निर्माणको काम चीन सरकारले गर्ने भने पनि अहिलेसम्म सुरू हुन नसकेको भन्दै उनले तत्काल नेपाल सरकारले नै पुनर्निर्माणको काम थाल्नुपर्ने बताए । 

सांसद केसीले चीन सरकारले सो दरबारको पुनर्निर्माणको काम गर्ने नगर्ने भन्नेबारे पनि सरकारले तत्काल वार्ता गर्नुपर्ने आवश्यकता औँल्याए । 

“नुवाकोटको ऐतिहासिक साततले दरबार २०७२ सालको भूकम्पले क्षतिग्रस्त बनाएको नौ वर्ष भयो । पुनर्निर्माण हुन नसक्दा खण्डहरको रूपमा परिणत भएको छ । चीन सरकारले बनाई दिने घोषणा त गर्‍यो । तर, आजसम्म त्यसै थिलथिलो रहेको छ । यसबारे पटक–पटक मैले कुरा उठाएँ । तर, कुनै पनि सरकारले पटक्कै ध्यान नदिएकोप्रति खेद व्यक्त गर्दै यसको पुनर्निर्माणमा चीन सरकारसँग तत्कालै वार्ताद्वारा टुंग्याउने वा सरकारले नै युद्धस्तरमा कार्य सुरु गर्ने काम तत्काल गरोस्,” उनले भने ।