नयाँ दिल्ली । भारतको गुरुग्रामबाट उत्तराखण्ड घुम्नको लागि गएका पर्यटक चढेको गाडी दुर्घटना हुँदा १४ जनाको मृत्यु भएको छ । १२ जना घाइते भएका छन् ।  

पर्यटकले भरिएको गाडी रुद्रप्रयागको छेउमा बद्रीनाथ नेसनल हाइवेबाट अनियन्त्रित भएर करिब ३०० मिटर तल बगिरहेको अलकनन्दा नदी किनारमा झरेको थियो ।

रुद्रप्रयाग जिल्लाका आपदा प्रबन्धन अधिकारी नन्दन सिंह रजवारले जनाएअनुसार २६ जना लिएर गुडेको गाडी शनिबार बिहान साढे ११ बजे दुर्घटनाग्रस्त भएको हो । सो घटना रुद्रप्रयागको मुख्यालयबाट करिब सात किमी टाढा रैतोली ठाउँमा भएको थियो । सो गाडी शुक्रबार राति १० बजे नयाँ दिल्लीबाट चोपताका लागि निस्केको थियो । गम्भीर घाइते भएकाहरूलाई एयर लिफ्ट गरिएको उनले बताएका छन् ।

मुख्यमन्त्री पुष्करसिंह धामीले घाइतेको बारेमा अस्पतालमा गएर जानकारी लिएका थिए । उनले गम्भीर घाइतेलाई ४० हजार तथा सामान्य घाइतेलाई १० हजार रुपैयाँ आर्थिक सहयोग गर्ने घोषणा समेत गरेका छन् । बीबीसी