काठमाडौं । काठमाडौं महानगरपालिकाले गौचरण र चाबहिलमा विश्वकप क्रिकेटको लाइभ गर्ने भएको छ । काठमाडौं महानगरपालिका–५, हाँडीगाउँको सानो गौचरण र वडा नं ७ चाबहिलको गणेशस्थान फुटबल मैदानबाट प्रत्यक्ष प्रदर्शन हुने जनाएको छ ।

आईसीसी टी–२० विश्वकप क्रिकेटअन्तर्गत शनिबार बिहान नेपाल र दक्षिण अफ्रिकाबीचको खेल हुँदै छ । खेल नेपाली समयअनुसार बिहान ५ः१५ बजे सुरु हुनेछ ।

सबै खेलप्रेमी दर्शकलाई एउटै ठाउँमा ल्याएर उत्साहजनक वातावरणमा खेल हेर्न ठूला एलईडी स्क्रिनमा खेलको लाइभ गर्न लागिएको महानगरले जनाएको छ ।

यसअघि भएको नेपाल र नेदरल्यान्ड्सबीचको खेल टुँडिखेल, हाँडीगाउँ डबली र तीनकुनेमा लाइभ गरिएको थियो ।