काठमाडौं । संघीय संसद्का कर्मचारीहरूले आन्दोलन थालेका छन् । संघीय संसद् कर्मचारी युनियनको अगुवाइमा यही जेठ २९ गतेदेखि ध्यानाकर्षण गराएर आन्दोलन थालेका कर्मचारीले बिहीबारदेखि कालोपट्टी बाँधेर काम थालेका हुन् । 

उनीहरूले जेठ महिनाको अन्तिम दिनसम्म कालोपट्टी बाँधेर काम गर्ने र माग सम्बोधन नभए असार २ गते नयाँ आन्दोलनका कार्यक्रम घोषणा गर्ने कार्यसूची बनाएका छन् । संघीय संसद् कर्मचारी युनियनका अध्यक्ष गोविन्द बेलबासेले कोरोना अवधिदेखि नै तलब भत्ता वृद्धि नभएको भन्दै अतिरिक्त कामको मात्र भत्ता मागेको बताए ।

“कोरोनापछि कुनै पनि सेवा सुविधा नदिइकन काम गरिरहेका छौँ । बिहान ८ बजे नै समितिका बैठक हुन्छन्, साँझ ८ बजेसम्म सदनका बैठक चल्छन् । हामीले यसवापत कुनै सेवा सुविधा पाएका छैनौँ,” अध्यक्ष बेलबासेले बाह्रखरीसँग भने, “हामीले देशलाई अप्ठेरो परेका बेला तलब बढाउनु भनेका छैनौँ । तर, अतिरिक्त काम गरेवापतको सुविधा मात्र मागेका छौँ ।” 

उनले गत वर्ष वैशाख १३ मै माग पत्र बुझाएको र महासचिवले निर्णय गरेर सिफारिस पनि गरिसकेको जानकारी दिए । महासचिवको सिफारिस अनुरुप सभामुख नेतृत्वको संघीय संसद् सचिवालय व्यवस्थापन समितिले समेत निर्णय गरेको तर त्यो लागु भने हुन नसकेका कारण आन्दोलन गर्नु परेको बताए । “महासचिवले निर्णय गरेर पठाउनुभयो, त्यो सुनुवाइ भएन । व्यवस्थापन समितिले निर्णय गरेर रायका लागि अर्थ मन्त्रालय पठाएकोमा सुनुवाइ भएन भन्ने छ,” अध्यक्ष बेलबासेले भने, “हामी त संघीय संसद् सचिवालय व्यवस्थापन समितिलाई चिन्छौँ, हाम्रा माग सम्बोधन गर्ने उसैले हो ।” 

कर्मचारीहरूको माग पत्रमा आईएलओ महासन्धिको दफा ३० को उपदफा ३ अनुसार अतिरिक्त कामका लागि अतिरिक्त सुविधा, श्रेणीविहीन कर्मचारी तथा हलुका सवारी चालकहरूलाई छैटौँ तह कायम गरी सुविधा दिन, बैठक सञ्चालक कार्यविधिलाई समयानुकूल बनाउनसहितका ११ बुँदे माग सभामुखलाई बुझाएका छन् ।